Estonııanyń elektrondy basqarý akademııasynda (eGA) elektrondy úkimet júıesi negizgi qaǵıdattary men elementteri, onyń ishinde saıası jáne zańnamalyq aspektiler talqylandy. Akademııa atqarýshy dırektory Arvo Ott joǵary tehnologııalardy damytý memlekettiń táýelsizdik alǵannan keıin negizgi basymdylyqtarynyń birine aınalǵanyn jetkizdi. Qazir Estonııa - Eýroodaqtyń sandyq tehnologııalar salasyn damytý boıynsha kóshbasshy elderiniń biri.
Astanadaǵy Memlekettik qyzmet salasyndaǵy óńirlik hab basqarýshy komıtet tóraǵasy Alıhan Baımenov ǵalamdaný, aqparattyq tehnologııalar damýy memlekettik qyzmetke jańa synaqtar men jańa múmkindikter týǵyzǵanyn aıtty. Estonııa tájirıbesi - ınnovasııany memleketti basqarýda tıimdi paıdalaný úlgileriniń biri. «Mysaly, sandyq tehnologııalardy engizý arqyly byltyr osy eldiń úkimeti azamattardyń buryn memlekettik qyzmetti alý úshin kezekke ketetin bir aptadaı ýaqytyn jáne qorǵanysqa jumsalatyn bıýdjetke teń qarjyny únemdegen», - dedi Baımenov.
Qatysýshylar bilim berý, densaýlyq saqtaý, qoǵamdyq kólikterde qyzmet kórsetý, «smart-sıtı» jobasyn júzege asyrýdyń bir bólshegi retinde Tallın qalasy turǵyndarymen onlaın-quraldar arqyly qarym-qatynas jasaý jáne quqyq qorǵaý júıesi sııaqty ári túrli salalardaǵy ınnovasııalyq sheshimdermen tanysty. Ásirese emdelýshiniń barlyq málimetterin, onyń ishinde medısınalyq saqtandyrý qujatyn da ortaq portalda shoǵyrlandyratyn densaýlyq saqtaý salasyndaǵy ıntegrasııalanǵan elektrondy júıe qyzyǵýshylyq týdyrdy.
Akademııa sarapshylary elektrondy ıdentıfıkasııa mehanızmderi men sandyq prosedýralardy qaýipsiz jaǵdaıda jasaýdyń negizi sanalatyn elektrondy qoltańba jaıly baıandady. Mamandardyń aıtýynsha, Estonııanyń barlyq derlik azamaty elektrondy qoltańbaǵa ıe, bul «sandyq memleket» qyzmetin, máselen, uıaly telefon arqyly jedel alýyna jol ashady.
Qazaqstandyq delegasııa, sonymen birge Ulttyq Call Ortalyǵynda bolyp, eston depýtaty, eston-qazaqstandyq parlamenttik toptyń tóraǵasy Denıs Boródıchpen de kezdesti. Kezdesý barysynda Estonııanyń ınternet arqyly Parlamentke daýys berý ótkizgen alǵashqy memleket ekendigi aıtyldy. Al 2000 jyldyń tamyz aıynda Estonııa qujattar jelisin paıdalanyp, qaǵazsyz otyrys ótkizgen álemdegi birinshi el boldy.
Baǵdarlama aıasynda «Úkimet azamattar úshin» memlekettik korporasııa basqarma tóraǵasy Abylaıhan Ospanov jáne eGA atqarýshy dırektory Arvo Ott memlekettik qyzmet kórsetý salasynda aqparat almasý jáne yntymaqtastyqty damytý boıynsha memorandýmǵa qol qoıdy.
Habtyń turaqty seriktesteriniń biri – eGA - elektrondy basqarý, elektrondy demokratııa jáne ashyq aqparattyq qoǵamdy damytý boıynsha ozyq tájirıbe men bilim qalyptastyrý jáne taratýǵa baǵyttalǵan saraptamalyq ortalyq ári keńes berý uıymy. Akademııa 60-tan astam eldiń 3500 memlekettik qyzmetkerin oqytyp, 60-tan artyq halyqaralyq aqparattyq-kommýnıkasııalyq jobalarǵa qatysqan.
Qazaqstandyq delegasııa Helsınkı qalasynda da fın áriptesterimen kezdesip, memlekettik qyzmetkerlerdiń kásibı biliktilikterin arttyrý tásilderi men memlekettik qyzmet kórsetý joldaryn jaqsartý týraly pikir almasty. Fınlıandııa Qarjy mınıstrliginde taraptar memlekettik qyzmet salasyndaǵy yntymaqtastyqty keńeıtý máselelerin talqylady.
Astanadaǵy Memlekettik qyzmet salasyndaǵy óńirlik hab - aımaqtaǵy memlekettik qyzmet salasyndaǵy tájirıbe men bilim almasýdyń ınstıtýsıonaldy alańy. Qazirgi tańda Habtyń qatysýshy-elderi qatarynda 38 memleket, onyń ishinde Amerıka, EO, TMD, Kavkaz jáne ASEAN elderi bar.
