– Joldan buryn aýylymyzǵa mádenıet úıi kerek bolyp tur. Joldyń nasharlyǵyna shydap keldik, shydaı beremiz de. О́ziń kórip turǵandaı, biz alystaǵy ormandy aýylda turamyz. Biz bárimiz aýyl bolyp «Egemendi» oqımyz, kúndelikti poshta qazir kelip turady. Burynǵy aýdan ákimderiniń bári ýáde berdi, biraq Esilbaıda mádenıet úıi áli ashylǵan joq. Osy máseleni endi gazetińe jazsań, – dedi aýyldyqtardyń atynan sóz alǵan jergilikti kásipker, aýdandyq máslıhattyń depýtaty Qısamıden Maqaýuly.
Negizi aýyldyń bas kótereri, árbir iske bastamashysy, demeýshisi de osy kásipker kórinedi. Aýylda «Qazaq handyǵynyń 550 jyldyǵyna» arnalǵan eskertkishtiń ashylýyna, «Máńgilik el» beıneli stellasynyń jasalýyna, balalar oınaıtyn oıyn alańyn jasaýǵa úles qosypty.
Shegiren aýyldyq aýmaǵyna qarasty Esilbaı aýylynda 650-deı adam turady. Aýyldyqtardyń deni ormanshy, Seıten orman sharýashylyǵynda eńbek etýde. Kúndiz-túni qalyń qaraǵaıly aǵashty órtten qorǵap, ań-qustaryn saqtaýǵa úles qosýda. Sondyqtan, kishkentaılarynan qalyń aǵashqa kózderi úırenip, búldirgenin, qaraqatyn terip jeıtin balalar áke, aǵalarynyń jolyn qýyp ormannan alys kete almaıdy eken. Solardyń biri – Qobylandy Atyǵaı S. Toraıǵyrov atyndaǵy ýnıversıtettiń orman sharýashylyǵy fakýltetin bitirip, qazir sharýashylyqta qyzmet atqarýda.
Aýyl mektebiniń aldynda oılana qarap Shoqan Ýálıhanovtyń músini tur. Kútim qajet-aq. Jalpy, mekteptiń syrtqy kórinisi de júdeý tartyp tur. Mektep 1992 jyly jańadan salynyp, paıdalanýǵa berilipti. Aıtpaqshy, 1990 jyly mekteptiń qurylys jumystary toqtap qalǵan kezde aýyldyń ótinishin arqalap, marqum Qaıken Isabek aqsaqal Almatyǵa deıin barǵan. Shegiren keńsharynyń dırektory Qalaý Qarataıuly osy mektepti salýǵa bastamashy bolyp, aýyl kóshelerin jóndep beripti. Qazir mektepte 77 oqýshy bilim alýda.
– Men osy aýylda týyp-óstim. Mektepte talaı jyl muǵalim boldym. Osy jaqynda ǵana ákimdik qyzmetke keldim. Birlesip «Týǵan jer» baǵdarlamasy aıasynda jumys jasaımyz dep oılaımyn, – deıdi aýyl ákimi Jasulan Ábeldınov.
Aýyl dastarqany mol, qaımaq, sút, balqaımaq, qurt, irimshik, nan-toqash deısiz be, bári jaınap tur, mal-jan aman. Átteń, qoldary jetpeı turǵan áleýmettik máseleler – jol, eń bastysy, mádenıet úıi kerek. Ákimder talaı jylǵy ótinishti oryndap, shalǵaıdaǵy aýyldy qýantsa eken deımiz.
Farıda BYQAI,
«Egemen Qazaqstan»
Pavlodar oblysy,
Esilbaı aýyly
