Basqarma tóraǵasy eksporttyq áleýetke ıe qazaqstandyq aýyl sharýashylyǵy kásiporyndary tómendetilgen paıyzdyq mólsherlemeler boıynsha tıimdi nesıe qarajattaryn ala alatynyn málimdedi.
Maı shyǵaratyn zaýyttardy, et kombınattaryn, et baǵytyndaǵy qus fabrıkalaryn, qurama jem zaýyttaryn, jemis-kókónis qoımalaryn, jylyjaı keshenderin, taýarlyq balyq óndirisin jáne t. b. qurý, keńeıtý jáne jańǵyrtýǵa qatysty ınvestısııalyq jobalar endigi qarjylandyrý basymdyǵyna ıe. «Agrarlyq nesıe korporasııasy» 2016 jyldyń sońynan bastap ınvestısııalyq jobalardy qarjylandyrýǵa baǵyttalǵan «AgroEksport» baǵdarlamasyn iske asyryp jatyr. Bıylǵy jylǵa baǵdarlama bıýdjeti shamamen 80 mlrd teńgeni quraıdy.
«AgroEksport» baǵdarlamasy otandyq aýyl sharýashylyǵy óndirýshilerine nesıe alýdyń barynsha tómendetilgen mólsherlemesin usynady. Ol sońǵy qaryzgerge jylyna 8%-dy quraıdy. Nesıelendirýdiń uzaq merzimdi túri – 10 jylǵa deıin qarastyrylǵan, al jeńildikti kezeń 2 jylǵa sozylady, ol aıaqtalǵannan keıin nesıeni tóleý kezeńi bastalady. Baǵdarlamanyń mindetti talaptary – turaqty qarjylyq ahýal, bıznes jospardyń bolýy, jobaǵa kem degende 15% jeke qarajatpen qatysý, sondaı-aq, kepilzattardyń bolýy.
Nesıeni negizgi quraldardy satyp alýǵa, sonyń ishinde nysandardy jańǵyrtýǵa, qurylys-montaj jumystaryna jáne rekonstrýksııalaýǵa, ınvestjobany iske asyrý aıasynda aınalym qarajattaryn tolyqtyrýǵa alýǵa bolady.
«AgroEksport» baǵdarlamasy boıynsha qarajattar ANK-dan tikeleı jáne ekinshi deńgeıli qazaqstandyq bankter arqyly bólinetin bolady. Korporasııa birqatar banktermen sáıkes kelisimderge qol qoıdy, olardyń ishinde Ulttyq bank, ForteBank, SesnaBank, Bank VTB Qazaqstan, Sberbank jáne t. b. bar. Investjobalardy qurý úshin qarjy alýǵa nıet bildirgen klıentter Qazaqstan boıynsha bankterdiń bólimshelerine qujattaryn ótkize alady.
