Búgin Astanadaǵy Mańǵystaý oblysynyń mádenıet kúnderi aıasynda EKSPO alańynda ornalasqan «Kazakh Invest» pavılonynda Mańǵystaý oblysynyń ákimi Eraly Toǵjanov pen 10-nan asa shetel elshileriniń qatysýymen ınvestısııalyq kezdesý ótti. Shara aıasynda óńir basshysy Mańǵystaý oblysynyń ınvestısııalyq potensıaly týraly baıandady.
- Elbasy alǵa qoıǵan mindetterdi iske asyrýda, sonyń ishinde ınvestısııa tartý baǵytynda Mańǵystaý oblysynda qol jetken jetistikter barshylyq. Búgingi tańda oblystyń ınvestısııalyq portfelinde júzege asyp jatqan 49 joba jáne 2 mlrd AQSh dollar somasyna birneshe jobany iske asyrý kózdelgen. «Aqtaý teńiz porty» arnaıy ekonomıkalyq aımaǵy iske qosylǵannan beri 74 mlrd teńge ınvestısııa tartylyp, 231 mlrd teńgeniń ónimi óndirilip, bıýdjetke 19 mlrd teńge kóleminde salyqtar tólendi. Aımaqta 12 mekeme belsendi qyzmet etýde jáne myńnan astam jumys ornyn qurylǵan. Osy oraıda Mańǵystaý oblysynyń áleýeti zor, keleshegi kelisti dep bilemin, – dedi Mańǵystaý oblysynyń ákimi Eraly Toǵjanov.
Basqosý aıasynda Mańǵystaý oblysy ákimdigi men birneshe sheteldik kompanııalar arasynda memorandýmǵa qol qoıyldy. Munaıly Mańǵystaý qytaılyq ınvestorlarmen ekonomıkanyń san túrli salasynda senimdi seriktestik ornatyp keledi.
«SITIC Group Corporation» korporasııasynyń ókilderi Mańǵystaý oblysy Qarajanbas kenornynda sý tushytý zaýytyn salý jobasyn iske asyrmaq. Osy maqsatta óńir basshysy Eraly Toǵjanov pen sheteldik kompanııa basshysy arasynda eki jaqty memorandýmǵa qol qoıdy.
Sondaı-aq, Aqtaý qalasynyń ákimi Serikbaı Trumov Italııa eliniń ókilimen Lonıga qalasy arasynda baýyrlastyq jónindegi kelisimge qol qoıdy. Maqsat - qos qalanyń mádenı salada baılanystaryn nyǵaıtyp, týrızm jáne áleýmettik-ekonomıkalyq salalardyń damýyna yqpal etý, tájirıbe almasý.
Al oblys ákimi Fın eliniń «Varsıla» mekemesimen Mańǵystaýda 250 megavattyq elektrstansııasyn salý jóninde kelisim shartqa qol qoıdy.
