Buǵan deıin kópshilik aqıyq aqynnyń ómiri men shyǵarmashylyǵyna qatysty kóshirme materıaldarmen ǵana tanysyp kelse, bul jańalyq kelesi jyly keńinen atap ótiletin 125 jyldyǵyna úlken tartý bolmaq.
BAQ ókilderimen júrek jardy qýanyshty bólisken muraǵattyń dırektory Sáýle Málikovanyń aıtýynsha 1922 jyldary Maǵjan Aqmola gýbernııasynyń ashtyqpen kúres jónindegi komıtetin basqarǵan. Ol aýyldardy aralap, qazaqtardyń aýyr halimen, azapty turmysymen tanysqannan keıin kórgen-bilgenderin esepti baıandamaǵa arqaý etip, tıisti oryndardy habardar etken. Aıyrtaý, Mezgil bolystarynda turatyn qazaqtardyń dala jıdekterin ǵana talǵajý etip otyrǵanyn, ábden álsirep, túrli indet aýrýlar jaılaı bastaǵanyn ashyp aıtqan. Munymen shektelip qalmaı, kózi ashyq azamattar men dáýletti jandardy jumyldyra otyryp arnaıy qor qurǵan. Sóıtip, talaı adamdardy ashtyq qursaýynan qutqarýǵa tikeleı járdemdesken. Kókshetaýda jetim balalar úıin ashýǵa yqpal etken.
Orys tilinde jazylǵan eki bettik esepti baıandamada sol kezdegi ashy shyndyq jaıly kóptegen derekter keltirilgen. Ult janashyrynyń ashyqqandarǵa kómek berý maqsatymen Aqmola gýbernııasy tótenshe jaǵdaılar komıssııasy tóraǵasynyń orynbasary retinde Petropavl jáne Kókshetaý ýezderine issaparǵa jiberilgenin aıǵaqtaıtyn mandat berilgenin eskersek, tupnusqa maqala aqynnyń óz qolymen jazylǵany esh talas týdyrmaıdy. Keıin ashtyqtyń aýyr zardaptary jaıly jergilikti «Mır trýda» gazetine kólemdi maqala jarııalaǵan.
Muraǵat mamandary «EKSPO-2017» halyqaralyq mamandandyrylǵan kórme sheńberinde ótetin oblystyń mádenıet kúnderi barysynda tarıhı mańyzy ólsheýsiz qujatty respýblıka turǵyndarynyń nazaryna usynýdy maqsat etip otyr.
О́mir Esqalı,
«Egemen Qazaqstan»
Soltústik Qazaqstan oblysy
