Aıtalyq, Qaraǵandy qalalyq №4 emhanasynda jaǵymdy jańalyqtar, ónimdi ózgerister jeterlik. Máselen, elektrondy qyzmetti damytý – álemdegi medısınalyq qyzmet kórsetýdiń jańa deńgeıi. «Densaýlyq» memlekettik baǵdarlamasyna sáıkes, elimizdiń medısınalyq qyzmet kórsetý salasyna ınnovasııalar engizý zaman talabyna saı jańa kezeńge kóterilip keledi.
Osyǵan baılanysty byltyr Qaraǵandy óńirinde «Vıenna» JShS kompanııasy men oblystyq densaýlyq saqtaý basqarmasy «SOS qyzmetimen dıstansııaly bosanýǵa deıingi patronaj» birlesken jobasyn iske qosqan bolatyn. Atalǵan jobamen alǵash tájirıbe júrgizgen mamandardyń biri, Qaraǵandy qalasynyń №4 emhanasy dırektorynyń ana men bala densaýlyǵyn baqylaý boıynsha orynbasary Janar Bashekova jaıly áńgimelemekpiz.
Janar Muhamedkárimqyzy – naýqastardy emdeýde kánigi maman jáne baı tájirıbesin jas mamandarmen bólise biletin biregeı basshy. Jumysy tikeleı analar men balalarǵa qatysty dáriger «Densaýlyq» baǵdarlamasynyń talaptaryna tolyq jaýap beretin jáne júktilik kezindegi ana men bala ólimine tosqaýyl bolarlyq asa qajetti medısınalyq kómektiń túrin alǵash paıdalanýda birshama ıgilikti ister atqaryp otyr. 1998 jyly Qaraǵandy memlekettik medısına ýnıversıtetiniń pedıatrııa fakýltetin úzdik bitirgen Janar Bashekova 2015 jyldan beri №4 qalalyq emhanada eńbek etip keledi.
Áıelderdiń júktilik kezeńindegi daıyndyǵy men olardyń densaýlyǵyna jaýaptylyqpen qaraý – Bashekovanyń basty mindeti.
«Bizdiń emhanada 64792 adam tirkelgen bolsa, onyń 34105-i áıelder. Búginde bul qosymshany 700-den astam júkti ana paıdalanyp otyr. Sáıkesinshe, Qaraǵandyda náresteler men analardyń ólim-jitim sanyn «SOS qyzmetimen dıstansııaly bosanýǵa deıingi patronaj» qyzmetimen birneshe ese tómendettik. Ol kórsetkishterdi júktilik kezinde de, bala týǵannan keıin de 42 kún boıy jaqsartýǵa baǵyttalǵan. Baǵdarlamany kez kelgen aıaǵy aýyr ana uıaly telefonyna tegin júkteı alady. Onda profılaktıkalyq sharalarǵa baılanysty tolyq aqparat, pasıent pen dárigerdiń yntymaqtastyǵyn jaqsartý, jedel járdem qyzmetiniń sapasyn arttyrý kózdelgen», deıdi ol.
Búgingi tańda júkti áıeldiń jaǵdaıyn baqylaý, naqty turǵylyqty jerin bilý, jedel kómek kórsetý smartfon nemese planshetke mobıldi qosymsha ornatý arqyly júzege asyryla bastady. Qosymshada dárigerge arnalǵan vırtýaldy jumys kabıneti jasaqtalǵan. Onda dáriger qaralýshynyń barlyq derekterin tolyq kóre alady.
Jalpy, oblystyq densaýlyq saqtaý basqarmasynyń derekterine súıensek, jyl saıyn óńirde 22 myń 500 bala dúnıege keledi. Náreste ólimi 6,9 paıyzǵa tómendegen.
Mine, Janar Muhamedkárimqyzyndaı jandardy biz dárigerlerdiń ishindegi dáneker maman deýimizge bolady. Sebebi, olar ana men balanyń arasyndaǵy jaǵdaıdy turaqty baqylaý, emdelýshi men aq halatty abzal jandardyń arasyndaǵy jumysty jaqsartý jaǵyna únemi kóńil bólip otyratyn talapshyl ári tabandy jumys atqaratyn qyzmetkerler. Mysaly, byltyr sozylmaly júrek aqaýyna ushyrap, bala tabýyna tyıym salynǵan ananyń júktilik kezeńin tolyq qadaǵalap, aman-esen ul bala dúnıege kelip, jas náreste men táýekelshil anaǵa jaryq sáýleni qatar syılaı bildi.
Mıras ASAN,
«Egemen Qazaqstan»
Qaraǵandy oblysy
