Sýret: bbc.com
Júk kóligi týrıster kóp qatynaıtyn alańdaǵy kóshe boıymen 530-dan astam metr qashyqtyqty júrip ótken. "Islam memleketi" terrorlyq toby lańkestik aktige jaýapkershilikti óz moınyna alyp otyr. Katalonııa basshysy Karles Pýchdemon 100 adamnyń zardap shekkendigin jetkizdi. Quqyq qorǵaý organynyń ókilderi bul qaıǵyly oqıǵany terakt dep sıpattady. Al bıliktegiler zardap shekkenderdiń qatary áli de artatynyn aıtty.
Qylmystyq áreketti jasady degen kúdikpen eki azamat ustaldy. Olar marokkalyq jáne Mılılıa (Soltústik Afrıkanyń ıspandyq anklavy) turǵyndary. Biraq ustalǵandar mınıvenniń júrgizýshileri bolmaı shyqty. Ázirge belgili bolǵandaı, qashyp qutylǵan kólik júrgizýshisine izdeý salyndy.
Al jumaǵa qaraǵan túni ıspanııalyq polısııa taǵy bir lańkestik shabýyldyń aldyn aldy. Barselonadan 100 shaqyrym jerde ornalasqan Kambrıls qalasynda 5 kúdikti mert bolyp, bireýi jaraqat aldy. Shabýyldaýshylar 7 adamdy jaraqattady.
Oqıǵa qalaı boldy?
Jergilikti ýaqyt boıynsha 16:50-de (Astana ýaqyty boıynsha 20:50) shabýyl jasaldy. Júk kóligi Katalonııa alańy jaqtan adam toly Rambla býlvaryna shyqty. Ortalyq býlvardyń uzyndyǵy 1,2 km. Bul alań týrıster arasynda óziniń bazar dúkenderi men shaǵyn restorandarymen tanymal.
Mınıven adamdardy basyp ótip, 80 km/saǵ jyldamdyqpen 500 metrdeı jol júrdi.
Qurban bolǵandar men jaraqat alǵandar
Qazirgi tańda 13 adam qaza taýyp, júzden astam adam jaraqat alǵan, onyń 15-i aýyr hálde. Ispanııalyq resmı ókilderdiń habarlaýynsha, Barselonada ótken teraktide 18 eldiń azamaty jaraqat alyp, sonyń ishinde kóz jumǵandar da bar.
Olardyń ishinde: Germanııa, Fransııa, Ispanııa, Nıderland, Argentına, Venesýela, Belgııa, Aýstralııa, Vengrııa, Perý, Rýmynııa, Irlandııa, Gresııa, Kýba, Makedonııa, Qytaı, Italııa jáne Aljır.
Kim bul áreketke bardy?
Polısııa eki kúdiktini ustaǵanyn habarlaǵan bolatyn.
Basynda polısııa Magrebı Drıss Ýkabıra esimdi azamatty «fıattyń» júrgizýshisi retinde izdeýge saldy.
Keıin BAQ kózinde ol azamat qujattaryn joǵaltyp alǵandyǵy jarııalandy. Urlanǵan qujat arqyly lańkester kólikti jalǵa alǵandyǵy belgili boldy.
Ekinshi lańkestik
Kóshede júrgizilip jatqan polısııalyq áreketterge baılanysty Katalonııa bıligi Kambrıls qalashyǵynyń turǵyndaryn kóshege shyqpaýyn ótindi.
Shabýyl jasaǵandardyń naqty sany belgisiz bolyp otyr. Ispanııa prokýrory Haver Saragosa myrzanyń habarlaýynsha, ustalǵan kúdiktiler terrorlyq aktige baılanysty buǵan deıin sottalmaǵan.
Bılik qalaı áreket jasady?
Túrli qurylymdardyń polıseıleri birneshe aýdandy qorshaýǵa alyp, ár úıdi tintip shyqty.
Metronyń eki joly jabylyp, ortalyq stansııalar qulyptaldy.
Bıliktegiler uıaly jelilerge júkti azaıtý maqsatynda turǵyndarǵa uıaly telefon qoldanbaı, áleýmettik jeli arqyly baılanysýlaryn surady. Sonymen qatar, polısııa terakt bolǵan orynnan foto, vıdeo taratpaýdy ótindi.
Jaýapkershilikti kim aldy?
Bılik bolǵan oqıǵany terakt dep baǵalady, al «Islam memleketi» ekstremıstik toby shabýylǵa kináni óz moınyna aldy. Alaıda sarapshylar IM-niń habarlamalaryna kúdikpen qaraýǵa shaqyrdy.
Jurt qalaı áreket etti?
Shabýyl bastalǵan kezde adamdar jaqyn mańda ornalasqan dúken, kafe men ofıs ortalyqtarynda jasyrynatyn jer izdep júgirdi. Keıin olardy polısııa ókilderi evakýasııalap, qaýipti aımaqtan alyp shyqty.
Kýágerlerdiń aıtýynsha, býlvarda ádettegideı adam kóp boldy. Taksı qyzmeti adamdardy ortalyqtan tegin alyp ketip jatty.
«Men adamdardyń bir mezette shyńǵyrǵanyn estidim. Burylyp qarasam, aq mınıven ketip bara jatyr eken. Basynda mán bermedim. Keıin onyń tym jyldam júrip, jan-jaqqa burylyp ketip bara jatqanyn baıqadym. Ol jol jıeginde júrgen adamdardy ádeıi tapaıyn degen pıǵylyn sol kezde bildim», dedi atyn jasyryn ustaýǵa suraǵan amerıkalyq týrıst.
Álem ne dedi?
Ár memlekette ornalasqan Ispanııa elshilikteriniń aldyna jergilikti turǵyndar gúl shoqtaryn qoıyp, al saıasatkerler kóńilhattaryn joldap jatyr. Ispanııa úkimeti elde úsh táýlik aza tutý kúnin jarııalady. Parıjdegi Eıfel munarasy da Barselonadaǵy terakt qurbandaryna taǵzym etip, jaryǵyn óshirdi.
Daıyndaǵan
Aıgúl ShERNIIаZ,
«Egemen Qazaqstan»
