Aqtóbe mektepteriniń jańa oqý jylyna daıyndyǵyn búgin oblystyq bilim basqarmasynyń basshysy Sáýle О́mirbekova tekserdi. Olardyń arasynda úshaýysymda bilim beretin №41 orta mektep te bar. Munda barlyǵy 600 oqýshy bilim alady. Balalardyń teń jartysy tasymaldanady.
«Burynǵy balabaqsha ǵımaraty mektepke saı qaıta jabdyqtalǵan. Mundaǵy jertólede bı kabıneti, kitaphana bar. Bı alańy sport-zal bolyp esepteledi. Bıyl mekteptiń jylý júıesi tolyq jańartyldy. Al keler jyly kóktemde jańa mektepke kóship, qazirgi bilim ordasy qaıtadan balabaqsha bolady», dedi mektep dırektory Aıjan Orazalına.
Aıta keteıik, Aqtóbe oblysyndaǵy mektepter jańa oqý jylyna 95 paıyz daıyn. Keıbir oqý oryndarynda shaǵyn jóndeý jumystary júrip jatyr. «Qazirgi kezde 25 mekteptiń qurylysy júrgizilýde. Bul apatty, úsh aýysymdy mekteptertiń máselesin sheshýge baǵyttalǵan jumys. Qyrkúıekte 9 mektep paıdalanýǵa beriledi. Jyl sońyna deıin taǵy 5 mekteptiń qurylysy aıaqtalýy tıis. Esep boıynsha barlyǵy 16 myń bala birinshi synypqa barady. Qazirgi kezde qazaq synyptaryna orys tili men ádebıetinen, bastaýysh synypqa orys tili páninen sabaq beretin muǵalim qajet bolyp tur. Keıbir aýyldarǵa hımııa, fızıka pániniń muǵalimderi qajet»,- dedi Aqtóbe oblystyq bilim basqarmasynyń basshysy Sáýle О́mirbekova.
Aıta keteıik, Aqtóbe oblysy bıyl oqýlyqtarǵa 1,2 mıllıard teńge qarjy bóldi. Baıǵanın, Mártók aýdandaryna kitaptar taratylyp jatyr. Al Aqtóbe qalasyna qajetti oqýlyqtar búgin júk kóligimen jetkizildi.
