Saltanatty is-shara qazaqtyń uly bıiniń týǵan jeri – Qarqaraly aýdany Egindibulaq aýlynda ótti.
Oǵan Parlament depýtattary, memlekettik organdar jeketshileri, qoǵam qaıratkerleri, belgili ǵalymdar men shyǵarmashylyq zııaly qaýym ókilderi qatysty.
Is-sharaǵa qatysýshylar Qazybek bı eskertkishine gúl shoqtaryn qoıdy. Sonymen birge, Qaraǵandy oblysynyń shyǵarmashylyq ujymdary ázirlegen «Qaz daýysty Qazybek bı» atty teatrlandyrylǵan qoıylym kórsetildi.
Memlekettik hatshy Qazaqstan Prezıdentiniń saltanatty is-sharaǵa qatysýshylarǵa arnalǵan quttyqtaýyn oqyp berdi. Onda Qaz daýysty Qazybek bı babamyz ultymyzdyń tarıhynda esimi altyn árippen jazylǵan qaıratker tulǵa ekeni atap ótildi. Búgingi táýelsiz, beıbit ári órkendegen Qazaqstan – ata-babalarymyz armanynyń oryndalǵanynyń belgisi. Osynyń bári halqymyzdyń birligi men yntymaǵynyń arqasy. Biz – ótkenimizdi qasterlep, búginimizdi qadirleı otyryp, bolashaqqa zor úmitpen qol sozamyz. «Rýhanı jańǵyrý» baǵdarlamasyn iske asyrý arqyly tarıhymyzdy, mádenıetimiz ben ulttyq jadymyzdy jańǵyrtyp, odan ári baıytatyn bolamyz.
Is-shara aıasynda Qazybek bıge arnalǵan halyqaralyq aıtysqa qatysýshy aqyndar arnaý shyǵaryp, elimizdiń tanymal ártisteriniń qatysýymen merekelik konsert ótti. Shara qazaq kúresi jáne alaman báıge sııaqty sport jarystarymen jalǵasty.
Sondaı-aq, 30 tamyzǵa deıin Qaraǵandy oblysy aýmaǵynan Qyzylorda, Túrkistan, Taraz, Shymkent qalalary arqyly júrip, О́zbekstannyń Tashkent, Naýaı qalalaryna deıin baratyn «Qaz daýysty Qazybek bı jolymen: babalarǵa taǵzym!» atty halyqaralyq avtokerýen jolǵa shyqty.
