Alqaly jıynǵa oraı Ortalyq kommýnıkasııalar qyzmetinde baspasóz máslıhaty ótip, oǵan «QazAgro» ulttyq holdıngi» AQ basqarma tóraǵasynyń orynbasary Gúlnaz Atamqulova qatysty. Ol aldymen aýyl sharýashylyǵy salasyndaǵy ınvestısııalyq saıasattyń negizgi mindeti agroónerkásiptik keshendi barynsha tıimdi damytý úshin ishki jáne syrtqy qarajatty tartýda qolaıly jaǵdaı jasaý ekenin aıtty. Qazirgi qoldanystaǵy agrarlyq sektordyń zańnamalyq bazasy álemdik naryqtyq ekonomıka talaptaryna saı keledi jáne birinshi kezekte, kásipkerlikti qoldaý men qorǵaýǵa baǵyttalǵan. Bul «Doing Business» reıtıngterimen dáleldengen.
«Memleket basshysy Nursultan Nazarbaev Qazaqstan halqyna Joldaýynda agrarlyq sektor el ekonomıkasynyń jańa draıveri bolýy tıis ekenin jetkizdi. Osy maqsatta 2017-2021 jyldarǵa arnalǵan agroónerkásiptik keshendi damytýdyń memlekettik baǵdarlamasy qabyldandy. Oǵan saı negizgi basymdyq básekege qabiletti ári naryqta suranysqa ıe bolatyn aýylsharýashylyq ónimderin óndirýge berilmek. «QazAgro» holdınginiń kredıttik jáne ınvestısııalyq saıasaty salanyń barlyq maqsattary men mindetterin eskere otyryp túzetilgen. Budan ózge, Úkimet ınvestısııalyq ahýaldy jaqsartý maqsatynda Ekonomıkalyq yntymaqtastyq jáne damý uıymynyń talaptaryna saı keletin jospar qabyldaǵan. Holdıng osyny oryndaý úshin bıyl ınvestısııalar tartý strategııasyn bekitip, sol boıynsha aqparattyq-ımıdjdik sharalardy ótkizbek», dedi Gúlnaz Tórehanqyzy.
Agroónerkásiptik keshendi damytýǵa baǵyttalǵan memlekettik mindetterdi iske asyrý úshin «QazAgro» bul salaǵa ınvestısııalardy kóptep tartýda aýqymdy jumys jasaýda. Holdıngtiń ınvestısııalyq baǵdarlamalaryn qarjylandyrýdyń negizgi kózderi – ishki jáne syrtqy kapıtal naryqtarynan tartylǵan qarajat. Spıkerdiń aıtýynsha, Qazaqstannyń aýyl sharýashylyǵy sektoryn damytý úshin «QazAgro» holdınginiń enshiles kompanııalary da sheteldik kapıtaldardy tartý úshin baryn salýda. Osynyń nátıjesinde sońǵy bes jylda salaǵa jalpy kólemi 375 mıllıard teńgeden asatyn sheteldik ınvestısııa quıylǵan.
«Qazirgi tańda on jylǵa 100 mıllıon eýro alý úshin Eýropalyq ınvestısııalyq bankpen kelissóz júrgizilýde. Bul qarjy elimizdegi agrarlyq sektorda klımattyń ózgerýi men onyń zardaptaryn jeńildeýge, aýyldyq shaǵyn jáne orta kásiporyndardy damytýǵa jáne jeke kásipkerlik sýbektileriniń kishi jáne orta jobalaryn júzege asyrýǵa járdemdesýge jumsalmaq», dedi basqarma tóraǵasynyń orynbasary.
Agroónerkásiptik keshenge tikeleı ınvestısııa tartýdyń bir túri tikeleı ınvestısııalyq qorlar desek, bastapqy kapıtaldandyrý 40 mıllıon dollardy quraıtyn birlesken qazaq-vengr tikeleı ınvestısııalyq qory bul baǵyttaǵy tuńǵysh bastama bolyp tabylady. Gúlnaz Atamqulovanyń aıtýynsha, qosymsha ınvestorlar tartý arqyly qordyń kapıtaldanýyn 150 mıllıon dollarǵa deıin ulǵaıtý josparlanýda. «Bul qor AО́K-tiń iske asqan, biraq qazirgi tańda qarjy tapshylyǵyn tartyp otyrǵan jobalaryn damytýdy, mal, qus, jemis-kókónis, balyq sharýashylyǵy, sút óndirisi, dándi jáne maıly daqyldardy, aýylsharýashylyq tehnıkasyn qurastyrý baǵytyndaǵy jańa jobalardy qarjylandyrýdy kózdeıdi. Sonymen qatar tehnologııalardyń transferti men jobalardyń menedjment sapasyn jetildirýge qyzmet etedi», degen ol tikeleı ınvestısııalyq qor aıasynda Aqmola oblysynda taýarly sút fermasy men mıneraldy tyńaıtqyshtar zaýyty jobalary qarastyrylǵanyn málimdedi.
«QazAgro» ulttyq holdıngi» AQ basqarma tóraǵasynyń orynbasary «AgroInvest Forum 2017» forýmy jaıynda áńgimelep, oǵan Azııa damý banki, Azyq-túlik qaýipsizdigi jónindegi ıslam uıymy, Islam damý banki, Halyqaralyq elektrondy saýda alańynyń jáne taǵy basqa uıymdardyń ókilderi qatysatynyn aıtty. Sharada qazaqstandyq óndirýshiler agrojobalardy iske asyrý men ınvestorlarmen jumys isteý tájirıbelerimen bólisedi eken. Sodan keıin qazaq-vengr qorynyń Aqtóbe oblysyndaǵy jylyjaı kesheni jobasyn iske asyrý boıynsha alǵashqy kelisim bekitiledi.
Ashat RAIQUL,
«Egemen Qazaqstan»
