Astanada Týreskıı horynyń gala-konserti ótti

Týreskıı hory – quryl­ǵa­nyna shırek ǵasyrdan astam ýaqyt ótken, ǵasyr qubylysyna aınalǵan reseılik ujym. Osy jyldardyń ishinde olar álemniń júzdegen elinde óner kórsetti. Ujym jyl saıyn 200-250 ret sahnaǵa shyǵady eken. Sonsha ret ushaqqa minedi desek te artyq emes. Hordyń eń basty ereksheligi – olardyń ónerinde shekaranyń joqtyǵy. Klassıkalyq ánderdi de, rokty da, pop-mýzyka men operany da, djaz ben halyqtyq hıtke aınalǵan ánderdi de oryndaıdy. Jandy daýys­pen án salatyn óner ıeleri barlyq kezde halyqtyń qoshemetine ıe. On shaqty tilde án shyrqaıtyn Týreskıı horynyń dúnıe júzine tanymal bolýyna áser etken jaǵdaı – olardyń konsertti buqaralyq shoýǵa aınaldyra alýynda bolsa kerek. Tek tańdaýly sahnalarda ǵana emes, ashyqaspan astynda da án shyrqaıtyn ónerpazdardyń konsertine halyq kóp jınalyp, óner ıelerimen qosylyp án shyrqaıtyn da jaǵdaılar kez­desedi. Sol úshin óner zertteý­shileri Týreskıı hory men onyń jetekshisin Reseıde buqa­ra­lyq mýzyka mádenıetin qalyptastyrýshylar retinde baǵalaıdy. 

2015 jyly Týreskıı horynyń quryl­ǵa­nyna 25 jyl tolýyna oraı Máskeýde úlken konsert ótti. «№1 Halyqtyq karaoke» degen atqa ıe bolǵan álgi konsertke 150 myńnan astam adam jınalǵan. Ánshiler ár býynnyń ánderin suryptap alyp, halyqpen qosylyp án shyrqaǵan sol konsert keıin Reseıdiń 9 qalasynda jalǵasyn tapty. 

Al endi Týreskıı horynda kimder óner kórsetedi degenge kelsek, álem halqyn tamsandyryp júrgen ujymnyń ónerpazdary negizinen erler qaýymy. 
Týreskıı horynyń so­lıs­teri – Evgenıı Kýlmıs esimdi bas-profýndo, ıaǵnı, bylaısha aıtqanda, shirkeý ánderin shyr­qaýǵa laıyqty óte tómengi da­ýys ıesi, Konstantın Kabo, Pa­vel Berkýt, Evgenıı Týlınov syndy tenorlar, barıton daýys­ty Aleks Aleksandrov, kúmis úndi Oleg Blıahorchýk pen Bo­rıs Gorıachev, kontrtenor Vıacheslav Fresh, soprano daýysty Mıhaıl Kýznesov búginde ujym arqyly tanymal mýzykanttarǵa aınalǵan.

«Qazaqstan» Ortalyq konsert zalynda ótken Týreskıı horynyń gala-konsertine halyq kóp jınaldy. Konsert bastalmas buryn Máskeý úkimetiniń mınıstri – Máskeý qalasy syrtqy ekonomıkalyq jáne halyqaralyq qatynastar de­par­tamentiniń basshysy Sergeı Chere­mın men Astana qalasy ákiminiń orynbasary Ermek Aman­shaev sahnaǵa kóterilip, konserttiń mán-mańyzyn atap ótti.  Sergeı Cheremın Astana men Más­keý qalalaryn tek saıası-eko­nomıkalyq baılanystar ǵana emes, mádenı-gýmanıtar­lyq baılanystar da jaqyn­das­tyratynyn aıtyp, byltyr ­kúzde Máskeýde ótken Asta­na kúnderinde qazaq ónerin tamashalaýǵa úlken qala­nyń mádenı oshaqtaryna kórer­menderdiń molynan jıylǵanyn eske saldy. Sondaı-aq, Asta­na­daǵy Máskeý kúnderiniń de sátti ótýine tilektestik bildirdi.  Al Astana qalasy ákiminiń oryn­basary Máskeý kúnderiniń baǵ­darlamasymen tanystyryp, elordalyqtar aldynda óner kórsetý úshin 200-den asa ónerpaz kelgenin habarlady. 

Hor ujymynyń konsert barysynda orys, ıtalıan, nemis tilderinde án shyrqaǵanyna kýá boldyq. Joǵaryda atap ótkenimizdeı, eń joǵarǵy tenor men eń tómengi bas daýysqa deıin aralyqtaǵy ánshilerdiń úılesimdi hory elordalyq kórermenderdiń yqylasyna bólendi. Ásirese, olardyń qazaq tilinde «Jastyǵymnyń kýási, shurqyraǵan aýylym. Jýsany men jýasy burqyraǵan aýylym» dep hıtke aınalǵan ataqty «Aýylym» ánin shyrqaýy rızashylyq týǵyzdy. 

Astanadaǵy Máskeý kúnderi aıasynda elordalyqtar taǵy da birneshe áserli keshter men is-sharalardyń kýási bolmaq. Atap aıtqanda, búgin «Astana» konsert zalynda  Máskeý mem­lekettik akademııalyq «Gjel» bı teatrynyń gala-konserti ótse, erteń Reseı halyq artısi, ta­lant­ty akter Dmıtrıı Hara­tıan­nyń shyǵarmashylyq keshi uıym­dastyrylmaq. Sondaı-aq, Reseıdiń tarıhy men máde­nıetinen syr shertetin kitap kór­meleri, «Moskva» jýrnalynyń bas redaktory Vladıslav Arte­movtyń shyǵarmashylyq keshi de Máskeý kúnderi aıasynda ótedi. 

Aıgúl SEIIL, 
«Egemen Qazaqstan»

Sýretterdi túsirgen Erlan OMAR,
«Egemen Qazaqstan»