Týrnırdiń alǵashqy kúni bizdiń qurama úshin sátsizdeý bastaldy. Birinshi aınalymnyń ózinde 52 kılo salmaqtaǵy Azamat Isaqulov pen 60 kıloda óner kórsetken Ádilet Qurmetov qarsylastaryna ese jiberip, jarys jolynan shyǵyp qaldy.
«Qurmetovtiń júıkesi syr berdi. Qarsylasy usynǵan ashyq aıqasty qabyl alamyn dep, opyq jep qaldy. Ras, tájirıbe kemdeý boldy, bir jaǵynan sheberlik te jetińkiremedi. Al Isaqulov bolsa, óziniń boksyn kórsetpedi. Qarsylasynyń yńǵaıyna jyǵyla bergeni durys bolmady. Odan da ózi oıly shabýyl uıymdastyryp, qarsylasyn yqtyryp alýy kerek edi», – dep túsindirdi boksshylarymyzdyń sátsizdigin qurama jattyqtyrýshysy Aleksandr Strelnıkov.
Degenmen, bul kúni Jomart Erjan (49 kg), Qaırat Erálıev (56 kg), Ábilhan Amanqul (75 kg) jáne Bekdáýlet Ibragımov (64 kg) jeńiske jetip, jankúıer qaýymnyń kóńilindegi kúdikti seıiltken bolatyn.
Jarystyń ekinshi kúnindegi jekpe-jekterdiń ishinde Qaırat Erálıev pen ózbek boksshysy Mýrodjon Ahmadalıev arasyndaǵy aıqasty erekshe ataýǵa bolady. Asa tartysty ótken bul jekpe-jekte bizdiń boksshy Rıo-2016 Olımpıadasynda óziniń jolyn kesken qarsylasyn aıqyn basymdyqpen jeńip, qarymta qaıtardy. О́zbek boksshysynyń bul salmaqtaǵy eń myqtylardyń biri ekenin esepke alsaq, Qaırat Erálıevtiń týrnırdi tamasha nátıjemen aıaqtaýǵa mol múmkindigi bar.
О́kinishke qaraı, 1/8 fınalda Bekdáýlet Ibragımov Armenııa boksshysy Ovaness Bochkovtan 2:3 esebimen jeńilip qaldy.
«Qazaq salmaǵynda» óner kórsetip júrgen Abylaıhan Júsipovtiń joly aýyrlaý bolyp tur. Italııalyq sheber, London Olımpıadasynda Danııar Eleýsinovti jarys jolynan shyǵarǵan Vınchenso Manjakapremen bolǵan jekpe-jek barysynda bizdiń boksshynyń basymdaý bolǵany ras edi. Shartpa-shurt aıqas kezinde ekeýi baspen súzisip qalǵan. Osynyń saldarynan Júsipovtiń mańdaıy jaryldy. Osy kezde, úshinshi raýnd aıaqtalmaı jatyp tóreshi jekpe-jekti toqtatty da, ıtalııalyq boksshynyń qolyn kóterdi. Degenmen, bizdiń jattyqtyrýshylar shtabynyń der kezinde túsirgen shaǵymy oń nátıje berip, AIBA sýpervaızeri jekpe-jek nátıjesin qaıta qarady da, Abylaıhan Júsipovti jeńimpaz dep tanydy. «Mundaı sátter jeńiske degen qulshynysty arttyra túspese, bálendeı keri áserin tıgize qoımaıdy», depti BAQ ókilderine bergen suhbatynda bizdiń boksshy.
Sondaı-aq, chempıonattyń shırek fınalynda Vasılıı Levıt (91 kg) pen asa aýyr salmaqtaǵy Qamshybek Qońqabaev ta baq synaıtyn boldy. Jalpy, bizdiń quramadan jeti boksshy shırek fınalǵa shyqsa, О́zbekstannyń toǵyz birdeı óreni týrnırdiń osy kezeńinde óner kórsetti. Aıtyp, aıtpaı ne kerek, bul álem chempıonaty da qazaq-ózbek bylǵary qolǵap sheberleriniń teketiresimen qyzyqty bolǵaly tur. Keshe keshki sessııada bul tartystyń alǵashqy jekpe-jekteri de ótti: sharshy alańda Erik Áljanov pen Bektemir Melıkýzıev jáne Qamshybek Qońqabaev pen Bahodır Djalolov kim myqtyny anyqtady. Budan bólek, tóreshiniń teperishinen aman qalǵan Abylaıhan Júsipov bolsa, venesýelalyq Gabrıel Mestre Perespen jekpe-jekke tústi.
Al kúndizgi sessııada 49 kılo salmaqtaǵy Jomart Erjan Eýropanyń bıylǵy chempıony, reseılik Vasılıı Egorovty tize búktirip, jartylaı fınalǵa shyqty. Sondaı-aq, 56 kıloda óner kórsetken Qaırat Erálıev te qarsylasynan basym tústi. Bul joly rıng ıesi Omar El-Hagty jarys jolynan yǵystyrdy. Vasılıı Levıt 91 kılo salmaqta aýstralııalyq Djeıson Ýotelımen kúsh synasyp, jeńiske jetti. Shırek fınalda bizdiń Ábilhan Amanquldy da óte aýyr jekpe-jek kútip turdy. Jerlesimiz Olımpıada chempıony, kýbalyq Arlen Lopespen qolǵap túıistirip, jekpe-jekti jeńispen aıaqtady.
Sonymen, kúndizgi sessııanyń statıstıkasyna saı, bizdiń tórt boksshymyz jartylaı fınalǵa joldama aldy. Al bul degenińiz – tórt qola júlde qorjynda degen sóz.
Qaırat ÁBILDA,
«Egemen Qazaqstan»
