«EKSPO-2017» halyqaralyq mamandandyrylǵan kórmesi aıasynda tusaýy kesilgen shyǵarma týǵan elge degen súıispenshilikti arttyrý, óńirdiń ásem tabıǵaty men kıeli jerlerin jáne tarıhı uly tulǵalardyń ómirin nasıhattaý baǵytynda túsirilgen. Fılmniń maqsaty – óskeleń urpaqqa qazaq halqynyń tarıhyndaǵy tuńǵysh kásipqoı balýan, kúsh atasy Qajymuqandy nasıhattaý arqyly salaýatty ómir saltyn ustanýǵa, qazaqsha kúreske, sportqa degen qyzyǵýshylyqtaryn arttyrýǵa, óz Otanyn qorǵaý men adal qyzmet etýge, Atamekenine degen tereń súıispenshilik pen patrıottyq sezimin oıatýǵa shaqyrady. Bul anımasııalyq fılmniń balalarǵa beretin tálim-tárbıesi de mol.
Tárbıelik, tanymdyq maǵynasy mol túsirilim Elbasy N.Nazarbaevtyń «Bolashaqqa baǵdar: Rýhanı jańǵyrý» maqalasynda kórsetilgen «Týǵan jer» baǵdarlamasyn júzege asyrý maqsatynda oblys ákimi J.Túımebaevtyń tapsyrysy negizinde qolǵa alyndy.
Anımasııalyq fılm jastarǵa ónege, úlgi sanalatyn uly tulǵalardyń ómirin nasıhattaıtyn qazaq halqynyń maqtanyshyna aınalǵan balýan babamyz Qajymuqan Muńaıtpasovtyń erlikterin pash etedi. Fılm Muqannyń jastyq shaǵynan bastalyp, onyń kishkentaı balaǵa saı erlikterin kórsete otyryp, álemdik deńgeıdegi bedeldi jarystarǵa, sonyń ishinde japon balýany Sarakıkımen kúresin sýretteıdi. Sonymen qatar, balýan babamyz halqy úshin, el aralap, óner kórsetip, sodan túsken qarjyǵa áskerı ushaq jasatyp, II Dúnıe júzilik soǵys maıdanyna jibergeni keńinen nasıhattalady.
2D formatyndaǵy týyndyny Shymkenttegi «SAQ» kınostýdııasy túsirgen. Kórsetilim rejısseri Batyrhan Dáýrenbekov bolsa, ssenarıı avtory jáne prodıýseri Baqytjan Quljabaev. Al anımasııalyq fılmniń bas operatory Fýrhat Saıpov, kompozıtory Rýslan Shynyqulov.
