Túrli kásip ıelerinen jınalǵan 12 myńnan asa aqtóbelik ortalyq stadıon alańynan bastap oblys ákimdigine deıin júrip ótti. Munda sherýge qatysýshylar Qazaqstan Respýblıkasynyń ánuranyn oryndaýmen ashylǵan saltanatty sharaǵa qosyldy.
- Búgin biz Qazaqstannyń uly, eń basty merekesin atap ótýdemiz. 22 jyl buryn qazaqstandyqtar jalpy referendýmda Ata Zańymyz – elimizdiń Konstıtýsııasyn qabyldady. О́tken jyldardyń ishinde Qazaqstannyń Konstıtýsııasy óziniń ómirlik kúshin dáleldedi. Konstıtýsııanyń arqasynda elimizdiń ekonomıkasy damyp, Qazaqstannyń halyqaralyq arenadaǵy róli jyldan jylǵa artyp keledi. Azamattardyń quqyqtary men bostandyqtaryna kepildik beretin Ata Zańymyzdyń arqasynda júzden astam kóp ulttyń ókilderi Qazaqstanda - bir shańyraqtyń astynda bir januıadaı turyp jatyr. Osynyń barlyǵy prezıdentimiz Nursultan Nazarbaevtyń júrgizip otyrǵan saıasatynyń turaqtylyǵy men durystyǵynyń aıǵaǵy. Men oblys basshylyǵynyń atynan uly merekemen quttyqtap, densaýlyq pen qut-bereke tileımin. Qazaqstanymyz gúldene bersin!,- dedi oblys ákimi Berdibek Saparbaev jınalǵandarǵa.
Merekelik sharanyń aıasynda oblys ákimdiginiń aldynda sondaı-aq, 50 jupty bir mezette saltanatty tirkeý rásimi de ótti. Oblys ákimi Berdibek Saparbaev pen oblystyq máslıhat hatshysy Sánııa Qaldyǵulova ár jańa otbasyny quttyqtap, neke qııý kýálikterin tabys etti.
25 jyl otasqan 50 jup jas jubaılarmenotbasylyq ómirdiń qyr-syrymen bólisti. Olardyń qatarynda úılengenderine 65 jyl tolýyn toılap jatqan Baqyt pen Olga Izbasarovtar da bar. Olar jastarǵa bereke-birlikti amanattap, estelik syılyqtar tabystady. Dástúr boıynsha jas jubaılar vals bıin bılep, aspanǵa júrek tárizdi sharlar ushyrdy.
Shara kishkentaı bıshilerdiń horeografııalyq kórinisterimen jalǵasty.
