2 qyrkúıekte saǵat 21.00-de kúzet kompanııasynyń qyzmetkerleri men sheteldik jumysshylar (Úndistan azamattary) arasynda «Abý-dabı Plaza» qurylys alańynyń baqylaý-ótkizý beketinde turmystyq sıpattaǵy janjal oryn alǵan. Oqıǵa ornyna memlekettik qurylymdar men quqyq qorǵaý organdarynyń ókilderi keldi. Jedel sharalar arqyly oqıǵanyń aldy alyndy. Alaıda, birqatar azamattar qoǵamdyq tártipti buzyp, jaǵdaıdy ýshyqtyrmaqshy bolǵan. «Esil» aýdandyq prokýrory tártip buzýshylardy jaýapqa tartatyny týraly resmı eskertý jasady. Eskertýge qaramastan azamattar quqyq qorǵaý organdarynyń zańdy talaptaryna baǵynbaı, qoǵamdyq tártipti buzýdy jalǵastyrdy.
Zańsyz áreketterdiń aldyn alý úshin tártip buzýshylar toby aty-jónin anyqtaý jáne tekserý úshin «Esil» aýdandyq IIB-ǵa jetkizilip, 8 tulǵaǵa qatysty ákimshilik jaýap túrindegi sharalar qoldanylyp, ákimshilik óndiris qozǵaldy. Tekserý jáne sheshim shyǵarý úshin materıaldar ákimshilik sotqa joldandy. Qalǵan ustalýshylar profılaktıkalyq áńgimelesýden keıin jiberildi.
Qaqtyǵys saldarynan Úndistannyń eki azamaty túrli dene jaraqatymen medısınalyq mekemege jetkizildi. «Azamattardyń dáıeksiz aqparattar men túrli ósek-aıańdardy taratpaýlaryn suraımyz. Eske sala ketsek, qasaqana jalǵan aqparat taratqany úshin qylmystyq jaýapkershilik qarastyrylǵan (QR QK-niń 274-baby)», - delingen Astana qalalyq IID taratqan habarlamada.
