Olar – «Atameken» ulttyq kásipkerler palatasy men Bas prokýratýra arasyndaǵy kásipkerlerdiń júıeli máselelerin anyqtap, birlese otyryp sheshý jónindegi kelisim jáne Qazaqstan kásipkerleriniń quqyqtaryn qorǵaý jónindegi ýákil men Reseı Federasııasy prezıdenti janyndaǵy kásipkerlerdiń quqyqtaryn qorǵaý jónindegi ýákildiń kásipkerler quqyqtaryn qorǵaý men saladaǵy aqparatty bólisý jónindegi kelisim.
Basqosýdy ashyp, sóz sóılegen Qazaqstan kásipkerleriniń quqyqtaryn qorǵaý jónindegi ýákil Bolat Palymbetov Reseıdiń negizgi ekonomıkalyq seriktesimiz ekenin atap ótti. «Yntymaqtastyq qalyptasqan jyldar ishinde 6000-ǵa jýyq birlesken kásiporyn ashyldy. Reseı bıznes-ombýdsmeni ınstıtýtymen birlesip, aýqymdy jumys atqaryldy. Máskeýde, Atyraýda kezdesýler ótip, kásipkerlerdiń zańdy quqyǵy men múddesin qorǵaýdaǵy tájirıbe almasý turaqty túrde júrgizilip keledi», degen ol shekaraǵa jaqyn aımaqtarda eki eldiń shaǵyn jáne orta bıznesin damytýǵa barynsha múmkindik berýge nazar aýdardy.
Jıynda «Atameken» ulttyq kásipkerler palatasy basqarma tóraǵasy Abylaı Myrzahmetov qazirgi bızneste quqyqtyq salada alańdatatyn máselelerdi sheshý barysynda tájirıbe almasý qarqyndy júrip jatqanyn áńgimeledi. Kelisimsharttar men kelissózder EAEO aıasynda ǵana emes, qalyptasqan dostyq baılanys negizinde júzege asýda. «Kez kelgen qaýymdastyq kásipkerlik quqyǵyn qorǵaý men múddeni tanytý úshin qyzmet etedi. Bizdiń zańnama basqynshylyq túrde emes, dostyq qalypta bolýy kerek. Bizde zańnama men onyń qaıshylyqtaryn jaqsy biletin ınstıtýttar jumys isteıdi. Bizdiń eń basty mindetimiz – kelisim jasaý kúshi, bıznes úshin erejelerdi ózgertý. Memlekettik apparattyń bıznestiń qajettiligine qaraı nazar aýdarýynda aıtarlyqtaı nátıjege qol jetkizdik», dedi A.Myrzahmetov.
«Atameken» UKP basqarma tóraǵasy Bas prokýratýra men Memlekettik qyzmet isteri jáne sybaılas jemqorlyqqa qarsy agenttikpen birlesip atqarylǵan jumystardy da atap ótti. «Bizdiń mindetimiz – sheneýnikke kásipkerlik qyzmetke jasalatyn kedergi úshin qoldanylatyn jaza bar ekenin kórsetý. Sondyqtan kez kelgen zań men qujatta kásipkerlermen kelisý mańyzdy», dedi ol.
Reseı Federasııasynyń prezıdenti janyndaǵy kásipkerlerdiń quqyqtaryn qorǵaý jónindegi ýákil Borıs Tıtov «Atameken» ulttyq kásipkerler palatasynyń IV sezinde kóterilgen máseleler men atqarylǵan jumystar osy forýmdy ótkizýge negiz bolǵanyn jetkizdi. Onyń aıtýynsha, kásipkerlerdiń zańdy múddeleri men quqyqtaryn qorǵaýda Qazaqstannyń tájirıbesi qyzyǵarlyqtaı, sondyqtan eki eldiń ortaq múddesi men ekonomıkalyq baılanysynda bul sharanyń mańyzy zor. Forýmnyń basty maqsaty – ózgelerdiń qateligin zerttep, tájirıbe negizinde ońtaıly sheshimder tabý.
Ashat RAIQUL,
«Egemen Qazaqstan»
