Negizinen Á.Nurmaǵanbetov jumyspen qamtý ortalyǵyna 2016 jyly baryp tirkelipti. Jarty jyldaı oqyp, tıisti sertıfıkatyn alǵan bolashaq kásipkerge nesıe berý týraly sheshim qabyldanypty. Bulandy aýdany jumyspen qamtý ortalyǵynyń mamany Aıdar Jarovtyń aıtýynsha, byltyr nesıe alǵan kásipker óndiristi tek bıylǵy jyldyń basynda iske qosa alypty. Áıtse de onyń bul qadamy ázirge sátti bastalyp otyr. 3 mıllıon teńgege kásipker qural-jabdyqtar men tıisti shıkizat satyp alyp, ǵımaratty jalǵa alyp, jumysshylar jaldaǵan. Osylaısha ol óziniń alǵashqy mıllıon teńge tabysyn tapqany qýanyshty habar boldy.
«Biz aǵash satyp alyp, ony óńdeımiz, keıin odan demalýshylar úshin jazǵy baspana, monsha, ústel jáne ózge de dúnıeler jasaımyz. О́ndiristi 2017 jyldyń qańtarynda iske qostyq. Aǵymdaǵy jyldyń mamyr aıyna deıin mende jeńildikti kezeń, bıznesti damytý úshin óte yńǵaıly», deıdi Á.Nurmaǵanbetov.
Onyń shaǵyn kásiporny tapsyrysty 16-22 kúnde oryndaıdy eken. Jumysshylardyń jalaqysy 40 pen 80 myń teńge aralyǵynda kórinedi. Alǵashqy mıllıon teńge tabys tapqan jas kásipker III toptaǵy múgedek. Bir kezderi kúrespen aınalysqan jaqsy sportshy da eken. Alaıda, jaraqat alyp, sportty tastaýyna týra kelgen. Qıyndyqtan qaımyqpaǵan kásipker ózin basqa qyrynan tanytyp, endi qolǵa alǵan kásibin keńeıtpek oıda ekendigin aıtyp qaldy.
Asqar TURAPBAIULY,
«Egemen Qazaqstan»
Aqmola oblysy
