Osylaısha, Halyqaralyq kórmeler bıýrosy QR Prezıdentine jáne Qazaqstan úkimetine bilim berý, ınnovasııalar jáne yntymaqtastyqtyń negizgi qundylyqtaryna qoldaý bildirip, bolashaqtyń energııasy salasyndaǵy jahandyq yntymaqtastyqqa qosqan ólsheýsiz úlesi úshin alǵys aıtty. Atalǵan marapatty Bıýro prezıdenti Stın Krıstensen «Astana EKSPO-2017» UK» AQ basshysy Ahmetjan Esimovke tabystady.
Ekinshi altyn medal aýqymdy sharany tabysty ótkizýde aıanbaı eńbek etken EKSPO-2017 kórmesiniń halyqaralyq qatysýshylaryna berildi. Odan bólek, Halyqaralyq kórmeler bıýrosy «Astana EKSPO-2017» UK» AQ ujymyna kásibıligi men halyqaralyq qatysýshylarǵa qoldaý bildirgeni úshin abyroı medalin tabystady.
Ekinshi abyroı medaline erekshe qonaqjaılylyq tanytyp, álem azamattaryna shabyt syılaǵan Astana qalasy men onyń turǵyndary laıyq dep tanyldy. Syılyqty Astana qalasynyń ákimi Áset Isekeshov aldy. Taǵy bir abyroı medali kórme komıssary Rápil Joshybaevqa qatysýshylardy kóptep tarta bilgeni úshin berildi.
Sonymen birge, EKSPO-2017 kórmesiniń aınymas bólshekterine aınalǵan volonterlar men qoǵammen baılanys departamentiniń qyzmetkerleri arnaıy sertıfıkattarmen marapattaldy. EKSPO-2017 halyqaralyq mamandandyrylǵan kórmesi 10 maýsym kúni ashyldy. Úsh aı boıy ótkizilgen Kórmeniń jabylý saltanaty erteń, 10 qyrkúıekke josparlanǵan.
