«Qarýly Kúshterdiń 25 jyldyǵyna – joǵary jaýyngerlik daıyndyq!» uranymen aǵymdaǵy oqý jyly taktıkalyq oqý-jattyǵýlaryna, ártúrli bólimder men bólimshelerdiń halyqaralyq saıystaryna jáne tosynnan júrgizilgen tekserýler kezeńine toly boldy.
Sonymen, jaýyngerlik ázirlikti arttyrý boıynsha ótkizilip jatqan is-sharalar sheńberinde Qorǵanys mınıstri general-polkovnık Sáken Jasuzaqovtyń buıryǵy boıynsha Qazaqstan Respýblıkasynyń Qarýly Kúshterinde jedel-strategııalyq oqý-jattyǵý bastaldy. Oǵan 10 myńǵa jýyq áskerı qyzmetshi, 1500 birlikten asa jaýyngerlik tehnıka, 40-tan astam ushaq pen tikushaq, sondaı-aq Áskerı-teńiz kúshteriniń 5 korabli qatysýda. Tehnıka men qarý-jaraqtyń bir ýaqytta shyǵýymen mundaı aýqymdy is-sharalar bıylǵy jyly alǵash ret ótkizilip otyr.
О́tkizilip jatqan sabaqtardyń basty maqsaty áskerlerdiń jaýyngerlik ázirligin jáne belgilengen merzimde tapsyrmalardy oryndaý qabilettiligin tekserý bolyp tabylady. «Qarataý – 2017» oqý-jattyǵýyna jetekshilik etý Qorǵanys mınıstriniń birinshi orynbasary – Qarýly Kúshter Bas shtabynyń basshysy general-leıtenant Murat Maıkeevke tapsyryldy. Áskerlerdiń shoǵyrlaný aýdandaryna kenetten jyljýy, jaýyngerlik qoldanýdyń beıtanys aýdandaryna birneshe júzdegen shaqyrymǵa marsh jasaýy, shartty daǵdarys aýdanynda áýe desantyn túsirý Qarýly Kúshter óńirlik qolbasshylyqtarynyń áskerı polıgondarynda ótetin «Qarataý – 2017» jedel-strategııalyq oqý-jattyǵýynyń negizgi kezeńderi bolyp tabylady. Oqý-jattyǵýdyń barysy men prosesin Bas shtabtyń jedel toptary baǵalaıtyn bolady.
Alǵashqy kúnde barlyq túrler men ásker tekteri áskerı bólimderi men quramalarynyń jeke quramy jaýyngerlik ázirliktiń joǵary deńgeıine keltirildi. Áskerı basqarý organdary jaýyngerlik ázirlikke keltirilgennen keıin oqý-jaýyngerlik tapsyrmalardy alyp, belgilengen aýdandarda bólimshelerdi jedel almastyrýǵa kiristi. Atalǵan kezeńde kúrdeli jedel-taktıkalyq jaǵdaı qarastyrylǵan. Ol boıynsha qolbasshylarǵa anaǵurlym maqsatqa saı sheshim qabyldaýǵa, al bólimder men bólimshelerge urys alańynda shartty qarsylasqa sheber túrde qarsy turý qajet.
Daǵdarys aýdandaryna irgeles jatqan aýmaqtarda áskerlerdiń is-qımyldaryn bir ýaqytta qamtamasyz etý úshin sany 200 adamnan asatyn taktıkalyq áýe desanty túsirildi. Sátti túsirýden keıin desanttyq-shabýyldaý batalony aldyńǵy pozısııaǵa ornyǵyp, motoatqysh jáne tank bólimshelerin ári qaraı óristetý úshin jerdi baqylaýdy júzege asyrady.
Oqý-jattyǵý bastalysymen áskerlerdi basqarý dalalyq basqarý pýnktterinen júrgizilip jatqanyn aıta ketý qajet. Búgingi tańdaǵy basqarý pýnktteri barlyq qajetti baılanys túrlerimen jabdyqtalǵan. Búrkemeleý men qorǵalýdyń jetkilikti deńgeıine ıe. Bul uzaq ýaqyt boıy avtonomdyq jumysty júrgizýge múmkindik beredi.
Oqý-jattyǵýdyń jetekshisi general-leıtenant Murat Maıkeev atap ótkendeı, atalǵan oqý-jattyǵýdyń erekshelikteri 4 baǵytta, bir ýaqytta áskerlerdiń iri toptamasyn basqarý, Qarýly Kúshterdiń barlyq túrleriniń, ásker tekteri, jaýyngerlik jáne materıaldyq-tehnıkalyq qamtamasyz etý bólimderiniń ózara is-qımyly, sondaı-aq áskerı barlaý kúshteri men quraldarynyń múmkindikterin tekserý bolyp tabylady.
«Qarataý – 2017» jedel-strategııalyq oqý-jattyǵýy Qarýly Kúshterdi qoldanýda jańa kózqarastardyń tıimdiligin túbegeıli tekserýge, jalpy alǵanda, Qazaqstan armııasy bólimsheleriniń jaýyngerlik ázirligi men jaýyngerlik qabilettiligin baǵalaýǵa jáne ulttyq qorǵanysty ári qaraı jetildirý josparlaryn aıqyndaýǵa múmkindik beredi.
Áskerı vedomstvo basshysy bıylǵy jyly «Qarýly Kúshterdiń 25 jyldyǵyna – joǵary jaýyngerlik daıyndyq!» urany tolyq kólemde oryndalatynyna jáne oqý jylyn áskerler jaýyngerlik daıarlyqtyń sapaly jańa kórsetkishterimen aıaqtaıtyndaryna senim bildiredi.
Nurlybek Dosybaı,
«Egemen Qazaqstan»
