– Talǵat Marýanuly, «Astana» ótken aptada Eýropa lıgasynyń toptyq kezeńinde «Vılıarrealǵa» ese jiberdi. Alaıda, keminde bir upaı alatyn múmkindikteri bar edi. Sizdiń oıyńyzsha jerlesterimizge bul oıynda ne jetispedi?
– Shynymdy aıtsam, bapkerlerdiń jumysyna baǵa berýdi jón kórmeımin. Alaıda, meniń bir pikirimmen kópshilik kelisedi degen oıdamyn. Eger Qazaqstan premer-lıgasynda «Astana» qorǵanysqa kóbirek kóńil bólgeninde sońǵy úsh eýrokýboktyq oıynda 11 gol jibermes edi. Elordalyqtar ishki birinshilikte eýrokýboktyq deńgeıdegi úlken matchtar ótkizbeıdi. Osy jaǵy qıyndyq týdyryp otyrǵanyn jasyrý múmkin emes. Ispanııadaǵy úsh gol komandalyq oıynda ketken kemshilikterdiń saldarynan emes qorǵaýshylar men qaqpashynyń jekelegen qatelikterinen bolyp otyr. Eger Qazaqstan chempıonatynda ózge komandalar «Astanany» jıi qysymǵa alyp, osynyń áserinen elordalyqtar maýsym boıy qorǵanysta jınaqy ári saýatty oınap úırense, bapkerlerge de, oıynshylardyń ózderine de halyqaralyq matchtarǵa qatysý ońaı bolar edi. Máselen, «Vılıarrealǵa» qarsy oıyn aldynda «Astana» «Atyraýdy» qalaı shyr kóbelek aınaldyrdy. Qazaqstandyq komandalardyń elordalyqtarǵa laıyqty deńgeıde qarsylyq kórsete almaýy – «Astananyń» eýrokýboktardaǵy sátsizdikteriniń bir sebebi.
– Úsh jyl buryn «Vılıarreal» jerlesterimizdi 4:0 esebimen oısyrata utqan edi. Bul joly ondaı iri esep tirkelmedi. Bul elordalyqtardyń kúsheıgeniniń belgisi me, álde ıspanııalyqtardyń álsiregeni me?
– Árıne, «Astana» sońǵy jyldary kúsheıdi. Úsh jyl qatarynan kári qurlyqtyń basty dodalarynda óner kórsetý kez kelgen komandanyń qolynan kele bermeıdi. Osyǵan qarap-aq durys baǵytta kele jatqanyn ańǵarýǵa bolady. «Astana» – qazirgi ýaqytta elimizdegi turaqty, tabysty komanda. «Vılıarrealǵa» qarsy ótetin jaýapty kezdesýde jerlesterimizdiń baryn salaryna senimdimin.
– «Astana» ózine qajet oıynshylarmen tolyq jasaqtalmaǵan sekildi. Máselen, Ispanııadaǵy oıynda alańǵa ekinshi taımda shyqqan jigitter óz pozısııalarynda óner kórsetpedi. Qarjylyq fairplay erejesiniń transferge shekteý qoıylýy «Astanaǵa» keri áserin tıgizip otyr dep oılaısyz ba?
– Shynymdy aıtsam, qarjylyq fairplay aıtarlyqtaı kedergi deı almaımyn. Sebebi, bul halyqaralyq uıymnyń qoıǵan talaby. Mysalǵa ereje kedergi keltirip otyr dep qolyńyzben gol soǵa almaısyz ǵoı, sol sııaqty qaqpanyń da kólemine qysqarta almaısyz. Men bul jerde fair play erejesin emes kerisinshe «Astanadan» sońǵy jyldary maqtarlyqtaı qazaqstandyq oıynshynyń shyqpaǵanyn alǵa tartar edim. Komandany 11 legıonerge senip tapsyrý durys emes. Bylaı alyp qaraıtyn bolsaq, «Astanada» sheteldikterge básekeles bola alatyn oıynshylar shyǵa qoımady. Ylǵı da sol alańǵa shyǵatyn Logvınenko, Mýjıkov, Shomko. Arasynda Beısebekov pen Murtazaev kórinip turady. Boldy, basqa eshkim joq. Menińshe, «Astana» jergilikti myqty oıynshylarmen tolyqsa nemese akademııasyna kóńil bólse úlken kómegi tıer edi. Biraq sol jastarǵa qanshalyqty jaǵdaı jasalyp otyr eken? Elimizdiń úzdik komandasynyń óz bazasy, qosalqy alańy joq. Osydan keıin ne aıtýǵa bolady?
– Syrt alańda ótetin eýrokýboktyq oıyndarda «Astanaǵa» senimdilik jetispeıtini baıqalady. Bul oıynshylardaǵy sheberliktiń jetispeýshiligi me, álde basqa da sebepteri bar ma?
– Menińshe, bul stereotıp sekildi. Sebebi, «Astana» da, ulttyq qurama da óz jankúıerleriniń aldynda jaqsy óner kórsetedi. Menińshe, oıynshylardyń ózderi de osyǵan ishteı daıyn bolatyn sekildi. Al syrtta ótetin matchtarda ne oılaıtyny belgisiz. Psıhologııalyq qıyndyqtan bólek, «Astananyń» qonaqtaǵy oıyndary ońaı emes. Sebebi, ár oıynǵa keminde bes saǵat jol júrýi tıis. Al toptaǵy komandalardyń jaǵdaıy basqasha. Jarty jylda bir-aq ret Astanaǵa keledi. Uzaq jol júrý oıynshylardyń densaýlyǵyna da aýyr tıedi.
– Ishki birinshilikte «Astananyń» «Qaırattan» ózge qarsylasy joq dep aıtýǵa bolady. Osydan kelip «Astana» eýrokýboktyq oıyndarǵa laıyqty deńgeıde daıyndala almaıdy dep esepteýge bola ma?
– Osynyń saldarynan búkil qazaq fýtboly zardap shegip otyr. Básekelestik ornaǵan jerde «Astana» da, «Qaırat» ta, ulttyq qurama da ıgiligin kóretin edi. Komandalardyń alǵa qadam basyp kele jatqanyn joqqa shyǵara almaımyn. Biraq «Astana» men «Qaırat» ózgelerine qaraǵanda jyldam damyp barady. Birinshilik deńgeıi de artyp keledi, biraq aıtarlyqtaı jyldam emes. Budan bólek, ózge elderdiń de bir orynda turyp qalmaıtynyn este saqtaǵanymyz jón. Biz bir qadam alǵa jyljyǵanda, Eýropa birneshe qadam attap basady. Qazaq fýtbolynda básekelestik artýy úshin taǵy eki-úsh klýbtyń damýy kerek.
