Sharany barysynda Eljan Birtanov 2017 jylǵy 10 maýsym men 10 qyrkúıek aralyǵyndaǵy kezeńde Astana qalasynda ótkizilgen EKSPO-2017 halyqaralyq mamandandyrylǵan kórmesiniń sátti aıaqtalýymen barlyq qatysýshylardy quttyqtap, alǵysyn bildirdi.
«Bizdiń elde ótkizilgen bul aýqymdy is-shara Qazaqstannyń ekonomıkalyq múmkindiginiń óskenin, álem elderiniń arasyndaǵy onyń bedeli men joǵary ornyn kórsetti. EKSPO-ǵa 4 mıllıonnan astam adam bardy, bul osyndaı kelýshilerdiń kóp sanyna medısınalyq qyzmet kórsetý men sanıtarııalyq-epıdemıologııalyq salamattylyǵyn qamtamasyz etý boıynsha shyn máninde úlken jumys júrgizýdi qajet etti» dedi mınıstr.
Sonymen qatar, Eljan Birtanov medısına qyzmetkerleriniń kásibıligi, jedel is-qımyly kómekke júgingen adamdarǵa qysqa merzimde kómek kórsetýge, asqynýlarǵa jáne kelýshilerdiń shaǵymdaryna jol bermeýge múmkindik bergenin, Medısınalyq kómekke 9 myń adam júgingenin, onyń ishinde bir jarym myńy sheteldikter ekenin jáne birde-bir asqyný jaǵdaıyna jáne ólim jaǵdaıyna jol berilmegenin tilge tıek etti.
Sondaı-aq ol sanıtarııalyq-epıdemıologııalyq qyzmettiń qyzmetkerlerine profılaktıkalyq jumystyń aýqymdy kólemin júrgizýde mamandardyń júıeli jumysyna alǵys aıtty.
«Máselen, sanepıdqyzmettiń qyzmetkerlerimen kún saıyn kórmeniń aýmaǵynda ornalasqan 85 tamaqtaný obektisine jáne «MEGA Silk Way» SOO baqylaý júrgizildi. Tamaq ónimderiniń 35-ten astam ataýyna, azyq-túlik ónimderiniń 12 myńnan astam synamasyna ekspress-saraptama júrgizildi. Salmaǵy 11 tonna bolatyn azyq-túlik ónimderiniń 1625 partııasy jaramsyz dep tanylyp, EKSPR aýmaǵyna jiberilgen joq. Onyń ishinde 3 tonnadan astam azyq-túlik satylymnan alynyp tastalyp, joıyldy. Shetelden ınfeksııalyq aýrýlardyń ákelinýine jol bermeý maqsatynda Astana qalasynyń halyqaralyq áýejaıynda shetelden kelgen adamdarǵa kúsheıtilgen sanıtarııalyq-karantındik baqylaý júrgizildi. EKSPO kezeńinde 218 myń jolaýshy men 14 myń ekıpaj múshesi tekserildi. Asa qaýipti ınfeksııa kúdigi bar jolaýshylar anyqtalǵan joq» - dep tolyqtyrdy.
Eljan Birtanov sózin qorytyndylaı kele, medısına qyzmetkerlerine halyqqa medısınalyq kómek kórsetý kezindegi orasan zor eńbekteri, sheberlikteri men qaısarlyqtary jáne elimiz úshin mańyzdy halyqaralyq is-sharany medısınalyq qamtamasyz etý kezinde eren eńbek atqarǵandary úshin taǵy da alǵysyn bildirdi.
Raýan QAIDAR,
«Egemen Qazaqstan»
