«Qýatty ári ónimdiligi joǵary mashına jasaý salasyn qurý - eldiń ekonomıkalyq damýynyń eń basym baǵyttarynyń biri. Memleket salaǵa jan-jaqty qoldaý kórsetýde, sondaı-aq bul salaǵa strategııalyq ınvestorlardy tartý men aýqymdy ınnovasııalardy engizý turǵysynda barlyq qajetti jaǵdaıdy jasaýda. Búginde Qazaqstanda otandyq kompanııalarmen birge álemdik naryqtyń kóshbasshylary da ózderiniń qyzmetin tabysty túrde damytýda», - dep atap ótilgen Memleket basshysynyń quttyqtaýynda.
Prezıdent óńdeý ónerkásibiniń jalpy kóleminde mashına jasaý úlesi 10 paıyzǵa jýyq deńgeıde ekenin atap ótti. Indýstrııalandyrý kartasy aıasynda júzden astam joba iske qosylyp, elimizde buryndary óndirilmegen biregeı joǵary tehnologııalyq jańa ónimder paıda boldy.
«Mashına jasaý salasyn keshendi jańǵyrtý men onyń halyqaralyq deńgeıde júıeli túrde alǵa jyljýy Qazaqstannyń jahandyq básekege qabilettigin arttyrýǵa ári elimizdiń álemniń ozyq 30 memleketiniń qataryna qosylýǵa yqpal etetinine senimdimin», - delingen Elbasy quttyqtaýynda.
Aıta keteıik, Astanadaǵy forýmǵa álemniń 16 elinen 800-ge tarta delegat qatysýda. Dástúrli túrde uıymdastyrylyp kele jatqan bul shara osymen besinshi ret ótkizilip jatyr.
