Halyqaralyq zeınetaqy jáne áleýmettik qorlar qaýymdastyǵynyń jetekshisi – Qazaqstan

«Erekshe qýantatyn jaıt, elimizdiń Eńbek jáne halyqty áleýmettik qorǵaý mınıstrligi áleýmettik júıeni odan ári damytý strategııasyn jasaý bary­synda ózge elderdiń osyǵan baılanys­ty ozyq tájirıbelerin eskerýge erekshe mán beredi. Bul – durys qadam. О́ıt­keni áleýmettik qorǵaý júıesi kúr­deli ári názik sala. Halyqpen etene júzege asyrylatyndyqtan, jaýap­kershiligi óte joǵary. Qatelesýge bolmaıdy. Qazir Qazaqstanda qoǵamdyq sana serpilis ústinde. Barlyq salada jańǵyrtý jumystary belsendi júrgizilip otyr. Munyń áleýmettik qamsyzdandyrýǵa da tikeleı qatysy bar. Sondyqtan ózge elderge úlgi bolarlyq osyndaı jańǵyrýdy bastan ótkerip jatqan Qazaqstannyń Ha­lyqaralyq zeınetaqy jáne áleý­mettik qorlar qaýymdastyǵyna tór­aǵalyq etýi oryndy», dedi Hans-Horst Konkolevskı. Bas hatshy áleý­mettik qorǵaý júıesin odan ári jetil­dirý baǵytynda Qazaqstannyń aldaǵy ýaqytta da jetistikterge jete bere­tinine senimdi ekenin jetkizdi.

Semınarǵa qatysýshylar tilge tıek etkendeı, áleýmettik qamsyzdandyrý salasynda Qazaqstannyń mol táji­rıbesi bar. Muny basqa memleketter de kádege jaratýy, ózara tájirıbe almasýy kerek. Eńbek jáne halyqty áleý­mettik qorǵaý mınıstrliginiń uıym­das­tyrýymen ótken semınardyń negizgi maqsaty osy. Jıynǵa qatys­qan Halyqaralyq áleý­mettik qamsyzdandyrý men Halyq­aralyq zeınetaqy jáne áleýmet­tik qorlar qaýymdastyǵyna múshe mem­leketterdiń sarapshylary, memlekettik kirister komıteti men «Biryńǵaı jı­naqtaýshy zeınetaqy qory» AQ mamandary, EAEO-ǵa múshe elderdiń memlekettik qurylymdarynyń ókilderi Qazaqstanda áleýmettik salany túbegeıli reformalaý oıdaǵydaı júr­gi­zilip jatqanyna mán berdi. Eńbek jáne halyqty áleýmettik qorǵaý vıse-mı­nıstri Svetlana Jaqypova: «Qazirgi ýaqytta elimizde kóp deńgeıli zeınet­aqy júıesin qurý aıaqtalyp, áleýmet­tik saqtandyrý júıesi aıaǵynan nyq turdy. Áleýmettik qamsyzdandyrý júıe­sin jetildirý jalǵasýda. Bul rette 2018 jyldan bastap engiziletin jańa sıpattaǵy ataýly áleýmettik kómek­ti aıtýǵa bolady. Osy baǵyttaǵy jumys­tardy jemisti jalǵastyrý úshin áleý­mettik qyzmet kórsetý júıesin jań­ǵyrtýdyń tujyrymdamasy jasaldy. Tujyrymdamaǵa baılanysty halyq­aralyq sarapshylardyń oı-tujy­rymdary biz úshin óte mańyzdy», dedi.

Semınar barysynda qaýipsiz eńbek, demografııalyq ahýal jaıly da jan-jaqty sóz boldy. О́ıtkeni bul áleýmettik saq­tandyrýǵa tikeleı qatysty máse­le­ler. Tipti eńbek mıgranttarynyń ózi áleýmettik qamsyzdandyrýdan shet qal­maýy tıis. Keı jaǵdaıda bul talap oryndala bermeıdi. Jumys barysynda adamdar túrli jaraqat alady nemese eńbekke jaramsyz bolyp qalady, bala kútimine baılanysty demalysqa shyǵady. Osyndaı jaǵdaılarda olarǵa áleýmettik tólemder tólenýi tıis. Osyǵan jumys berýshilerdiń jaýapsyz qaraıtyny keıde kezdesip qalady. Sony joıý baǵytynda áleýmettik sala qyzmetkerleri zań sheńberi aıasynda tıisti jumystardy saýatty júrgize bilýi tıis. Eýrazııalyq odaqqa múshe memleketterdiń arasynda áleýmettik qamsyzdandyrý men saqtandyrýǵa baılanysty ózara tyǵyz baılanys bar, deıdi Eýrazııalyq ekonomıkalyq komıssııa Eńbek mıgrasııasy men áleýmettik qorǵaý departamentiniń bólim basshysy Sergeı Evdokımov.

Basqosýda áleýmettik salada ınno­vasııa men menedjmentke de basa na­zar aýdarý qajettigi aıtylyp qal­dy. Malaızııa áleýmettik saqtandy­rý uıymy basqarmasy jáne Halyq­ara­lyq áleýmettik qamsyzdandyrý qaýym­dastyǵynyń ınnovasııany uıym­dastyrý men basqarý jónindegi tehnıkalyq komıssııasynyń tóraǵasy Muh­ammed Azman bın Azız Muhammed: «Innovasııa ádette bıznes pen ekonomıkada ósýdiń qozǵaýshy kúshi re­tinde qarastyrylady. Menedjment de­ge­nimiz – bızneste kommersııalyq emes uıymda nemese úkimettik organda bol­syn, uıymdastyrýdy basqarý» dedi. Ma­laızııalyq meımannyń pikirinshe, áleýmettik qamsyzdandyrý men saq­tan­dyrý salasynda da jańashyldyqtyń lebi udaıy kórinis tabýy tıis.

Ǵalym OMARHAN,
«Egemen Qazaqstan»