Oǵan Ulttyq bank tóraǵasynan jaýap kelip, «Ázerbaıjan Respýblıkasynyń Qarjy mınıstrligine jáne Ázerbaıjan halyqaralyq bankine hattar jiberilgeni, sonymen qatar oblıgasııalardy ustaýshynyń merziminen buryn óteýdi talap etý quqyqtaryna, ÁHB oblıgasııalaryn merziminen buryn óteý jónindegi rásimderge túsinikteme alý úshin mámileni uıymdastyrýshy Citi Group-qa hat jazylǵany aıtylǵan. Alaıda, Citi Group-tan 2016 jylǵy sáýirde alynǵan resmı jaýapta ÁHB bereshegin merziminen buryn óteýden bas tartylǵany jetkizilgen. Kelissózder barysynda Ulttyq bank ÁHB-da qarajattyń joq ekenin eskere otyryp, ÁHB-nyń basqa ótimdirek oblıgasııalaryna nemese Ázerbaıjan Respýblıkasynyń memlekettik baǵaly qaǵazdaryna aıyrbastaý múmkindigin qaraýǵa daıyn ekendigin aıtqan. Sonymen birge Ulttyq bank oblıgasııalardyń quny Bloomberg aqparattyq-taldamalyq júıesi boıynsha eseptelip, 2017 jylǵy 10-24 mamyr aralyǵy kezeńinde nomınaldyq qunnan 92,28%-dan 81,69%-ǵa deıin tómendegenin jetkizgen. Jaýaptyń qorytyndysynda Londonda sheteldik kredıtorlarmen ótken kezdesý barysynda Ázerbaıjan halyqaralyq banki boryshtyń tıisti túrleri úshin qaıta qurylymdaýdyń 3 nusqasyn usynǵany aıtylǵan.
Al ótken sársenbi kúni Úkimet úıinde ótken baspasóz máslıxatynda «Astana» halyqaralyq qarjy ortalyǵynyń basqarýshysy Qaırat Kelimbetov úsh aıǵa sozylǵan kelissózderdiń nátıjesinde ÁHB-nyń 250 mln AQSh dollaryna teń negizgi qaryzy qaıtarylatyn bolyp kelisilgenin málimdedi. Alaıda, ósim paıyzy tómendetilgen, biraq ÁHB-nyń Ázerbaıjan qarjy mınıstrliginiń kepildendirilgen eýrooblıgasııalaryna aýystyrylatyndyǵyn jetkizdi. Sóıtip, qoǵamdyq alańdaýshylyqtyń, sonyń ishinde depýtattardyń suraý salýymen BJEQ qarajaty ornyna keletin bolypty.
Ázirlegen
Jaqsybaı SAMRAT,
«Egemen Qazaqstan»
