Álipbı aýystyrý úshin jańa árip oılap tabýdyń qajeti joq. Qazaq tiline tán dybystar kompıýterdiń pernetaqtasynda ornalasqan klassıkalyq latyn grafıkasyna ábden laıyq. Jýyrda Sh.Shaıahmetov atyndaǵy Tilderdi damytýdyń respýblıkalyq koordınasııalyq-ádistemelik ortalyǵy osyndaı úlgidegi 25 áripti jańa álipbıdi parlamenttik tyńdaýǵa usynǵany, onyń qoǵamda qyzý talqylanyp jatqany aıan. Ásirese, álipbı quramyndaǵy qosarlanǵan daýysty dıftongtar jaıly kózqaras árqıly. Usynylǵan jańa grafıkaǵa qatysty jıynnyń biri Taldyqorǵandaǵy Til saraıynda ótti.
«Latyn álipbıi: jańǵyrý jazýdan bastalady» degen taqyryppen ótken jıynnyń uıymdastyrýshysy Oblystyq tilderdi damytý jónindegi basqarma. Assambleıa men túrli uıym músheleri, mekeme qyzmetkerleri, óńirdiń zııaly qaýym ókilderi qatysqan keńeste Oblystyq tilderdi damytý jónindegi basqarma basshysy Aıdar Bashbaev el damýy úshin usynylyp jatqan uly ıdeıalardy tek túsinýmen shektelmeı, olardyń iske asýyna belsene atsalysý qajettigin aıtty.
Al oblystyq «Jetisý» gazeti bas redaktorynyń orynbasary Núsipbaı Ábdirahymnyń aıtýynsha «Kez kelgen bastamanyń sátti júzege asýy úshin oǵan qoǵam tarapynan suranys bolýy kerek. Al latyn qarpine kóshýge qatysty másele qoǵam tarapynan zor qoldaýǵa ıe. О́zderińiz jaqsy bilesizder, halqymyzdyń álipbıi birneshe ret ózgerdi. Kóne túrki tańbasyn bylaı qoıyp, qazaqtar on eki ǵasyr boıy arab jazýyn paıdalanyp keldi. Tarıhymyzdyń qanshama bóligi, úlken qatpary arab jazýymen jazylǵan edi. Keıin A.Baıtursynulynyń reformasy negizinde tóte jazýǵa kóshtik. Tóte jazýdan keıin az ýaqyt latyn álipbıi qoldanylyp, birden kırıllısaǵa aýystyq». Sonymen birge álipbıdiń jıi aýysýy jas urpaqtyń ótkenin tanýǵa kedergi keltiretinin, arab pen kırıll tańbasynda qalyp qoıǵan qazaq tarıhyn qaıta qotarý qıyndyq týǵyzbaı qoımaıdy. Soǵan qaramastan halyqtyń 95 paıyzy latyn álipbıine kóshýge daıyn ekenin de atap ótti.
Obly styq Qazaqstan halqy Assambleıasynyń hatshylyq meńgerýshisi Ǵabıt Tursynbaıuly latyn álipbıine kóshý ult úshin qajetti bastamanyń biri bolyp tabylatynyn, Parlamenttegi alqaly jıynda aıtylǵan utymdy oılar men usynystar el úshin jasalyp jatqan ıgi qadam ekendigin tilge tıek etip, bul jumysty tııanaqtylyqpen, jaýapkershilikpen júrgizý kerektigin alǵa tartty. Jıynda sóılegen ózge qatysýshylardyń basym kópshiligi usynylǵan nusqany qoldaıtynyn jetkizdi.
Almas NÚSIP,
«Egemen Qazaqstan»
Almaty oblysy
