Otyrys barysynda saýda-sattyq, ınvestısııa, ónerkásiptik kooperasııa, aýyl sharýashylyǵy, ǵylym men tehnologııa, kólik jáne logıstıka salalaryndaǵy ekijaqty yntymaqtastyqty damytý máseleleri talqylandy.
A.Mamın Qazaqstan men Belarýs arasyndaǵy memleketaralyq baılanystyń barlyq deńgeıi sátti júzege asyp jatqandyǵyn, eki eldiń postkeńestik keńistikte, eń aldymen, Evrazııalyq ekonomıkalyq odaqqa birigýin tilge tıek etti. Taraptar 2017 jyldyń 7 aıynyń qorytyndysy boıynsha Qazaqstan men Belarýs arasyndaǵy saýda-sattyq aınalymynyń qarqynyn atap ótti. Bıyl qańtar-shilde aılaryndaǵy saýda-sattyq aınalymy byltyrǵy jylǵy kórsetkishpen salystyrǵanda, 75,6% ósip, 313,7 mln AQSh dollaryna jetken.
A.Mamın «2020 jyly eki el arasyndaǵy saýda-sattyq aınalymyn 1 mlrd. AQSh dollaryna deıin jetkizý kózdelip otyr»,- dep aıtyp ótti. Ol Qazaqstan men Belarýs ónerkásiptik kooperasııa, kólik-logıstıkalyq sektor, ǵarysh salasy, agroónerkásiptik keshen, mádenı-gýmanıtarlyq jáne ǵylymı-tehnıkalyq saladaǵy birlesken jobalardy júzege asyrýdyń úlken múmkindikterine ıe ekendigin de basty nazarda ustady.
Májiliste taraptar seriktestiktegi keleshegi bar baǵyttardy, mal sharýashylyǵy, ósimdik sharýashylyǵy, melıorasııalaý jáne jerdi sýarmalaý sııaqty jobalardy jasaý úshin ózara jumys tobyn qurý múmkindigin qarastyrdy. Sondaı-aq, qazaqstandyq aýyl sharýashylyǵy ónimderin Belarýs eline, al belarýstyq ónimderdi Qazaqstanǵa jetkizý máseleleri talqylandy. Sondaı-aq osy jyldyń qarasha aıynda Qazaqstannyń Syrtqy saýda palatasy men Belarýs eliniń Saýda-ónerkásiptik palatasynyń arasynda Qazaqstandyq-belarýstik iskerlik keńesti qurý týraly kelisimge qol qoıylady dep josparlanýda.
Mıras ASAN,
«Egemen Qazaqstan»
QARAǴANDY
