Memleket basshysynyń Qazaqstan halqyna arnaǵan Joldaýlarynda eldegi kásipkerlikti barynsha damytyp, oǵan barlyq jaǵdaıdy jasaý mindeti alǵa qoıyldy. Onyń ishinde salyqtyq aýyrtpalyqty azaıtý, menshik múlki men aktıvterdi zańdastyrý, nesıelik resýrstarǵa qol jetkizýdi jeńildetý, ákimshiliktik rásimder men ruqsat alýdy jeńildetý, bıýrokrattyq bassyzdyq pen baqylaý-tekserý organdarynan qorǵaý, shaǵyn jáne orta bıznesti qoldaýdyń aımaqtyq ortalyqtaryn qurý, marketıngtik zertteýlerdi júrgizýde kómek kórsetý, biliktiligin kóterý sekildi amaldar da iske asyrylýda.
Buǵan qosa Elbasy Astanada ótken Prezıdent janyndaǵy kásipkerler keńesiniń 1-shi jalpy otyrysynda-aq, kez kelgen kásipker óz bıznesine quqyq qorǵaý organdary ókilderiniń zańsyz aralasqanyn aıtyp, elektrondy poshta arqyly aryz-shaǵym jibere alatyn Prezıdent Ákimshiliginiń arnaıy saıtyn ashýdy tapsyrǵan bolatyn. Bul shara sol kezden bastap quqyq qorǵaý organdarynyń bıznesmenderge qoqan-loqqy kórsetip, zańsyz tekserý jasaıtyn keıbir ókilderiniń jolyn kesti. Sodan beri kásipkerlerdi zańsyz tekseristerden arashalaýdyń, qorǵaýdyń tıimdi joldary qarastyrylyp keledi. Búginde sonyń eń tıimdi de, sapaly túri tabylyp otyr. Ol – Bas prokýratýranyń Quqyqtyq statıstıka jáne arnaıy esepke alý jónindegi komıtetiniń kásipkerlerge usynǵan kómekshi quraly sanalatyn «QAMQOR» mobıldi qosymshasy.
Qazirgi kezde árbir kásipker mobıldi quraldar arqyly ózine tekserýshiler qashan, qaı kezde keletindigin aldyn ala bile alady. Máselen, biz aıtyp otyrǵan «QAMQOR» mobıldik qosymshasy birneshe fýnksııa atqarady. Sonyń ishinde mańyzdy degen 2 fýnksııany ataıyq. Onyń birinshisi, «QAMQOR» kásipkerge aldyn ala, ıaǵnı 1-2 kún buryn «Sizdi tekserýge keledi» degen Puch-habarlama jiberip qoıady. Ekinshisi, «Siz tekserýdiń zańdylyǵyn jáne ózektiligin teksere alasyz», degen kómek usynady. Osyǵan sáıkes, álgi «QAMQOR» mobıldi qosymshasy arqyly kelgen Puch-habarlamany ashyp, kásipkerdi tekserýge qatysty tulǵalar, tekserýdiń merzimi, quqyqtyq negizderi, tekserý máselesi týraly málimetterdi tolyq kórýge bolady. Demek, endi kásipker tekseristiń barlyq mán-jaıyn aldyn ala bilip otyrady. Jáne ol tekseris zańdy ma, zańsyz ba, negizdi me, negizsiz be nemese quqyǵy bar tekserýshiler me álde jalǵan alaıaqtar ma degendeı saýaldarǵa «QAMQOR» arqyly jaýap alady. Al shynaıy quqyqtyq zańdylyqpen qarýlanǵan kásipkerdiń ary taza bolsa eshteńeden qaýiptenbeıdi.
Eger kásipker zańnan tys aýytqýshylyq baıqasa, ózin qorǵaı alady. Oǵan onlaın rejimde tekserýge deıin jáne tekserý barysynda oryn alǵan zań buzýshylyqtardy habarlama retinde joldaýǵa tolyq múmkindik bar. Joldanǵan habarlamalar komıtettiń aýmaqtyq basqarmalaryna kelip túsedi jáne bul habarlamalar boıynsha jedel túrde naqty jaýap beriledi. Demek zańdy ne zańsyz isterdiń bári jedel qaralady. Endeshe mundaı zań ústemdik etetin jerde «tyrnaq astynan kir izdep» kásipkerge naqaq tıisý degen bola qoımaıtyny anyq. Al bul kásipkerge qamqorlyq jasaıtyn atalǵan mobıldik qosymshany kez kelgen qoldanýshy android úshin Play-Market-te, IOS úshin App store-da júkteı alady.
Qosymsha osy jyldyń sáýir aıynan bastap iske qosylyp, óziniń tıimdiligin kórsetýde. Mysaly, Jambyl oblysynda memlekettik organdar tarapynan jol berilip jatqan zańsyz áreketter týraly «QAMQOR» mobıldi qosymsha arqyly kásipkerlerden 2 ótinish túsken. Onda ústimizdegi jyldyń maýsym aıynda kásipker O.Malkova Taraz qalalyq densaýlyq saqtaý basqarmasy qyzmetkerleriniń zańsyz áreketterine shaǵym aıtqan. Sóıtse kásipker O.Malkovanyń qyzmetin tekserý negizsiz uzartylǵan eken. O.Malkova «QAMQOR» mobıldi qosymshasy arqyly habarlasqan soń bul fakti anyqtalǵan. Komıtettiń Jambyl oblysy boıynsha basqarmasynyń talaby boıynsha atalǵan tekserý zańsyz dep tanylyp, kemshilik jibergen laýazymdy tulǵalar jaýapkershilikke tartylǵan. Sol sııaqty Jambyl oblysy, Qarataý qalasy lıseıi ashanasynyń basshysy, jeke kásipker A.Jarova da «QAMQOR» mobıldi qosymshasy arqyly tıisti organǵa shaǵym túsirgen. Júrgizilgen tekserýdiń nátıjesinde, aýmaqtyq bilim bólimi qyzmetkerleriniń zańsyz tekserý júrgizgendigi anyqtalyp, 3 laýazymdy tulǵa tártiptik jaýapkershilikke tartylǵan. Osylaısha atalǵan «QAMQOR» mobıldi qosymshasy kásipkerlerge barynsha qamqorlyq tanytýda.
Aleksandr TASBOLAT,
«Egemen Qazaqstan»
