Jıyndy júrgizgen ulttyq bıýro basshysynyń orynbasary Maqsat Dúısenov memlekettik tildiń ulttyq saıasattyń dińgegi bolýy qajettigin baıandady. «Búgingi Qazaqstan – jańǵyrǵan qoǵam. Ár ulttyń óz rýhanı kody bolady. Jańa turpatty jańǵyrýdyń basty sharty – ulttyq kodty, onyń ishinde memlekettik tildi saqtaý. Bul tarıhymyzdan jáne salt-dástúrimizden baılanys úzbeýge septigin tıgizedi», dedi ol.
Basqosý barysynda Prezıdent janyndaǵy Memlekettik basqarý akademııasy Dıplomatııa ınstıtýtynyń professory Názıgúl Tólenbergenovanyń baıandamasy tyńdaldy. Ol óz sózinde sońǵy bir ǵasyrda óz tilderin joǵaltyp, ózge tilderdiń yqpalynda ketken halyqtar týraly áńgimeledi. Sondaı-aq elimizde orys tiliniń ústemdik qurýyna negiz bolǵan birshama jaıttardy, atap aıtqanda tyń jerlerdi ıgerý maqsatynda KSRO-nyń basqa respýblıkalarynan ákelingen júz myńdaǵan orys tildi halyqpen qarym-qatynastyń júzege asýyn, ken oryndaryn ıgerý maqsatynda salynǵan Lısakov, Rýdnyı, Temirtaý sııaqty qalalardyń paıda bolýyn, qalalarda qazaq mektepteriniń jabylyp qalǵan jaǵdaılaryn atap ótip, bul máselelerdiń áli kúnge deıin salqynyn tıgizip kele jatqanyn áńgime ózegine aınaldyrdy.
Elbasynyń strategııalyq qujattary – Ulytaýda sóılegen sózinde, «Bolashaqqa baǵdar: rýhanı jańǵyrý» maqalasynda ulttyq biregeılikti saqtaý, ulttyq kodty saqtaý týraly aıtylǵan. Sondyqtan memlekettik tilde sóıleý, jazý eń aldymen memlekettik qyzmetshilerden talap etilýi tıis», dedi N.Tólenbergenova. Professor ulttyq bıýro qyzmetshilerine tildi úırenýdiń eń ozyq ádis-tásilderin de kórsetip berdi.
Odan basqa, is-shara sheńberinde memlekettik Eltańbanyń 3D modeldermen beınelengen beınematerıaldary kórsetilip, memlekettik rámizder boıynsha trenıng ótkizildi.
Aıgúl SEIIL,
«Egemen Qazaqstan»
