О́ńirdegi túrli ult pen ulysty bir maqsat, bir tilekke uıytqan osynaý meken jaqynda 25 jyldyq mereıtoıyn keń kólemde atap ótti. Eki kúnge sozylǵan mereıtoılyq sharalarǵa Parlament Májilisi tóraǵasynyń orynbasary Vladımır Bojko, Qazaqstan halqy Assambleıasy hatshylyǵy meńgerýshisiniń orynbasary Sergeı Prokopenko bastaǵan, Senat jáne Parlament Májilisiniń depýttary Sergeı Plotnıkov, Irına Ýnjakova, Svetlana Ferho qostaǵan mártebeli qonaqtar qatysty.
Dostyq úıi - qoǵamdyq kelisim ortalyǵynyń shırek ǵasyrlyq mereıtoıyna arnalǵan sharalar Sársen Amanjolov atyndaǵy Shyǵys Qazaqstan memlekettik ýnıversıtetinde «Qazaqstandaǵy jáne shekaralas aýmaqtardaǵy etnodemografııalyq úrdister» atty halyqaralyq ǵylymı-tájirıbelik konferensııadan bastaldy. Konferensııanyń ashylý saltanatynda sóz alǵan Vladımır Bojko respýblıkadaǵy alǵashqy Dostyq úıi eldiń jaǵdaıy ári-sári bolyp, ultaralyq qarym-qatynastar ýshyǵyp turǵan eleń-alań shaqta Elbasynyń bastamasymen qurylǵanyn eske alyp, búginde tatýlyq pen turaqtylyqtyń, yntymaq pen yrystyń ordasyna aınalyp otyrǵanyn erekshe atap ótti. «Toqsanynshy jyldardyń basynda О́skemende UQK departamentin basqardym. Sol kezdegi oblystaǵy qoǵamdyq-saıası ahýal óte kúrdeli edi. «Endi bizdi qazaq tilin úırenýge májbúrleıdi, balalarymyzdyń bul elde bolashaǵy joq» dep meniń aldyma kelgen adamdar da boldy. Dostyq úıi osyndaı asa aýyr tusta ashylyp, ultaralyq qarym-qatynastardy ýshyqtyrmaýǵa úlken úles qosty. Keıin Qazaqstan halqy Assambleıasy quryldy. Sondyqtan О́skemendegi Dostyq úıiniń mańyzy, alar orny aıyryqsha», - dedi ol.
Jıynda baıandama jasaǵan oblystyq ishki saıasat basqarmasynyń basshysy Nellı Krasnobaeva qoǵamdyq kelisim ortalyǵynyń mereıli mereıtoıy Elbasynyń «Rýhanı jańǵyrý» baǵdarlamasy aıasynda atalyp ótip otyrǵanyna toqtalyp, tatýlyq mekeni shırek ǵasyr muǵdarynda kóptegen ıgi isterge muryndyq bolǵanyn tilge tıek etti. Oblysty meken etken ulttar men ulystardyń mádenıeti men salt-dástúrin tanystyratyn etnoaýyl, qoǵamdaǵy saıası-áleýmettik máselelerdi talqylaıtyn Qoǵamdyq kelisim keńesteri jáne ózge de bastamalar О́skemendegi Dostyq úıinen bastaý alǵanyn aıtty.
Ekinshi kúngi mereıtoılyq sharalardyń shymyldyǵy Dostyq úıi – qoǵamdyq kelisim ortalyǵynyń 25 jyldyǵyna arnalǵan forýmmen túrilip, elimizdiń ár aımaǵynan kelgen Dostyq úıiniń dırektorlary Elbasynyń «Bolashaqqa baǵdar: rýhanı jańǵyrý» maqalasyndaǵy mindetterdi júzege asyrý jaıyn jan-jaqty talqylady. Semeıdegi Dostyq úıiniń dırektory Berik Kópbaev Prezıdenttiń pármenimen qoǵamdyq kelisim ortalyǵy dep ataýy ózgertilgen Dostyq úıleri shyn máninde eldi tatýlyqqa shaqyryp, bereke-birlikke úndeıtin taǵylymdy ortalyqqa aınalǵanyn atap ótti.
Elimizdegi eń alǵashqy Dostyq úıiniń 25 jyldyǵyna arnalǵan mereıtoılyq sharalar oblys ortalyǵyndaǵy drama teatrda aımaq basshysy Danıal Ahmetov, Parlament Májilisi tóraǵasynyń orynbasary Vladımır Bojko, Qazaqstan halqy Assambleıasy hatshylyǵy meńgerýshisiniń orynbasary Sergeı Prokopenko, Senat jáne Parlament Májilisiniń depýttary Sergeı Plotnıkov, Irına Ýnjakova men Svetlana Ferhonyń qatysýymen ótken merekelik gala-konsertpen túıindeldi. Saltanatty rásimde sóz alǵan oblys ákimi jurtshylyqty qoǵamdyq kelisim ortalyǵynyń shırek ǵasyrlyq mereıtoıymen quttyqtap, birqatar etnomádenı birlestikterdiń jetekshileri men múshelerine Dostyq úıiniń 25 jyldyǵyna arnalǵan merekelik medaldardy tabys etti. Sonymen qatar buǵan deıin eski ǵımaratta otyrǵan Dostyq úıi qyzmetkerleri jaqyn kúnderi Metallýrgterdiń Mádenıet saraıyna kóshetindigin jetkizip, mereıtoı ıelerin bir qýantty.
Azamat QASYM,
«Egemen Qazaqstan»
О́SKEMEN
