Onda óńir basshysy qazynaly qarııalardy merekemen quttyqtap, birqatar ardagerlerdi marapattady. Ortalyq saıabaqta densaýlyq saqtaý basqarmasynyń uıymdastyrýymen ótken is-sharada oblystyń bilikti dárigerleri qart kisilerdi tegin dıagnostıkalyq tekserýden ótkizip, keńesterin berdi.
Ardagerlerdi saýyqtyrý isine de erekshe mán berilip keletinin aıtqan ákim, deni saý urpaq qalyptastyrýda jas urpaqqa úlgi bolýdy aıtty.
«Qazaqstan azamattarynyń densaýlyǵyn jaqsartý jáne ómir jasyn uzartý – Prezıdent saıasatynyń eń basty mindetteriniń biri. Sizderdiń ómirlik tájirıbelerińiz ben aqyl-keńesterińizdiń orny biz úshin qashanda bólek. Salamatty ómir saltyn ustanyp, deni saý urpaq qalyptastyrýda Sizder úlgi bolýlaryńyz qajet», - dedi aımaq basshysy.
Saıabaqqa jınalǵan jurtshylyq konserttik baǵdarlamamen qatar ardagerler arasynda ótken shahmat týrnırin tamashalady. Myń buralǵan kásibı bıshiler óner kórsetip, ánshilermen jarysa oblystaǵy yntymaǵy jarasqan barlyq etnos ókilderi óz tilderinde ánder shyrqady. Osylaısha qazan aıynyń alǵashqy kúni Shymkenttiń shyraıy ardagerlermen ajarlana tústi.
Sonymen qatar, 30 qyrkúıek pen 7 qazan aralyǵynda egde jastaǵy adamdardyń densaýlyǵyn nyǵaıtý jáne salaýatty ómir daǵdylaryn qalyptastyrý maqsatynda oblys kólemindegi aýrýhana-emhanalarda ashyq esik kúnderi ótedi. Al bir aı kóleminde oblys boıynsha Uly Otan soǵysynyń ardagerlerine medısına qyzmetkerleri úılerine baryp, qajet kómek kórsetetin bolady.
Aıta keteıik, oblysta 223 myń zeınetker bolsa, onyń 218-i Uly Otan soǵysynyń ardagerleri, 4946-y maıdanǵa qatysýshylar men múgedektikke teńestirilgender bolyp tabylady. Al 18 myńnan astamy tyl eńbekkerleri bolsa, 100-ge jýyǵy júz jastaǵy jáne júzden asqan qart kisiler. Búgingi tańda memleketpen kepildendirilgen tólemder kólemi jyl saıyn kóterilýde, oblystyq jáne jergilikti bıýdjetter qarjysy esebinen de túrli áleýmettik qoldaýlar uıymdastyrylyp keledi. Máselen, «Qamqorlyq» aksııasy sheńberinde bıyldyń ózinde 72 myńnan astam ardagerge 494,3 mln teńge kóleminde túrli áleýmettik kómekter kórsetildi. Al azamattardy saýyqtyrýda oblys ortalyǵyndaǵy «Ardagerler úıi» men «Meıir» ardagerler úıinde jylyna 8 myńǵa jýyq adam em alyp, demalady.
