Árıne, atamyz qazaq «mal alasy syrtynda, adam alasy ishinde» degendi de aıtqan, bul – ishki dúnıesiniń qandaı ekenine kóz jetkizbeı adamnyń syrtqy túrine aldanba degenge saıatyn naqyl.
Týysqan ózbek halqynyń jańa prezıdenti Shavhat Mırzııoevtiń túsindegi adamı jylylyq, jaqyndyq isinde de kórinis berip, eki eldiń arasyndaǵy qarym-qatynasty jandandyrýǵa beıildilik bar ekeni kórinip tur. Qazaqqa ózbekten jaqyn týys joq, alaıda aımaqtyq qaýipsizdik, terrorızm men esirtki trafıgine qarsy kúres sııaqty isterde strategııalyq áriptestik jalǵasyp jatqanymen buryn Qazaqstannyń ekonomıkalyq ıntegrasııa týraly ıdeıalaryna О́zbekstan jaǵynan qyzý qoldaý bola qoımady. Sondyqtan da eki eldiń arasyndaǵy belsendi qarym-qatynas birshama tosańsyp, tipti Qazaqstanda bolǵan túrli mádenı sharalarǵa da О́zbekstan jaǵynyń qatysýy saıabyrsyp qalǵan edi. Endi qazaq-ózbek qarym-qatynasy jańa sapadaǵy ozyq beleske shyǵatyn syńaı tanytyp tur.
Jýyrda О́zbekstanǵa barǵan saparynda Prezıdent Nursultan Nazarbaev ótkizilgen kelissózder eki el arasyndaǵy dástúrli tatý kórshilik pen dostyqty odan ári tereńdetip, nyǵaıta túsetinine senim bildirdi. Saýda-ekonomıkalyq jáne mádenı-gýmanıtarlyq yntymaqtastyqtardyń damýyn qamtyǵan 10 ekijaqty qujattarǵa qol qoıyldy. Eki eldiń arasyndaǵy yntymaqtastyq belsendiliginiń osylaı tyǵyz bolýy «О́zbek – óz aǵam» deıtin qazaq úshin tabıǵı jaǵdaı. Al Shavhat Mırzııoevtiń «Men Sizdi maqtan tutamyn» degeni de aǵaıyndy eki halyqtyń arasynda aıtylýǵa tıisti laıyqty baǵa.
Altyn, kúmis, volfram, fosforıt, ýran, molıbden, tabıǵı gaz jáne t.b qazba baılyqtarynyń qory jóninen álemde aldyńǵy oryndardyń birin alatyn О́zbekstannyń ekonomıkalyq damý áleýeti joǵary. Qazaqstanmen yntymaqtastyqty tyǵyz ornata otyryp, áleýetin ozyq ádispen paıdalana bilip, halqynyń ál-qýatyn arttyra tússe, oǵan qazaqstandyqtar rıza bolǵannan basqa ne aıtsyn.
Bul ǵalamda ózgermeıtin dúnıe joq, búgingi tańda О́zbekstan eliniń peıil qaqpasy ashylyp, kúpti kóńilder jadyrap, jarqyn isterge jol túsip, týysqan eki halyq bir-birine qaıtadan qushaǵyn jaıa bastaǵandaı bolyp otyr. Jańa prezıdent oryntaqqa otyrǵan bir jylǵa jetpeıtin ýaqytta Qazaqstan basshysymen alty ret kezdesti. Bul buryn bolyp kórmegen, asa úlken nazar aýdararlyq jaıt. Saýda-ekonomıkalyq qatynastar 35 paıyzǵa artqan. Buryn jyldap kórispeıtin memleketter basshylary endi jıi ushyrasyp, eki el halqynyń ómir súrý sapasyn arttyrýǵa laıyqty sheshimder qabyldanyp jatyr. Sonyń bir mysaly dep jýyrda ǵana, 2009 jyly qol qoıylǵan halyqaralyq avtomobıl qatynasy boıynsha kelisimge engizilgen hattamanyń ratıfıkasııalanýyn aıtýǵa bolady. Osynyń arqasynda burynǵy alty ótkizý beketine taǵy da eki beket qosylyp, eki eldiń iri qalalary arasynda avtobýs marshrýttary ashylyp, halyqtyń barys-kelisi artatyn boldy. «Barmasań, kelmeseń jat bolarsyń» dep dana qazaq aıtpaqshy uzaq jyldar boıy shekaranyń ar jaǵyndaǵy týystaryna, dostaryna barý qıynshylyq týǵyzyp júrgenderge endi jeńildik boldy.
Tashkentke barǵan saparynda Nursultan Nazarbaevtyń «El-jurt qurmeti» ordenimen marapattalǵandyǵy da jaqsy nyshan. Árıne bizdiń Prezıdent 1998 jyly О́zbekstannyń «Aıryqsha eńbegi úshin» ordenin alǵan. Biraq ol kezde Qazaqstan da óziniń «Altyn qyran» ordenin I.Karımovtiń keýdesine qadaǵan edi. Odan beri jıyrma jylǵa jýyq ýaqyt ótip, kóp nárse ózgerip, kóp sýlar aqty...
Sońǵy orden Qazaqstan Prezıdentiniń ortaazııalyq yntymaqtastyqty jandandyrýǵa sińirip kele jatqan erekshe eńbegin baǵalaǵandyq ekeni kórinip tur. Orden berilgen jarlyqta «Baýyrlas eki el arasyndaǵy dástúrli dostyq pen strategııalyq seriktestikti tereńdetý, keńeıtý, sonymen qatar beıbitshilik úshin álemdik qoǵamdastyqty nyǵaıtýdaǵy uly eńbegi úshin» delingeni de tegin emes. Ázirge bul ordenmen 26 adam marapattalsa, sonyń ishinde shet memleketter basshylary arasynan alǵan jalǵyz N.Nazarbaev qana. Másele ordende emes, jyly iltıpat pen ystyq yqylasta. Týysqan halyqtar bir-birimen jaqyn bolyp, tatý kórshi bolǵanǵa ne jetsin? Qazaqstan syrtqy saıasatynyń jyldar boıy ańsaǵany da sol ǵoı.
