Jıynda Memlekettik hatshy Qazaqstan Prezıdentiniń «Bolashaqqa baǵdar: rýhanı jańǵyrý» atty baǵdarlamalyq maqalasynda ashyqtyq pen úzdik jetistikterge beıimdelý qajettigin aıqyndap bergenin aıtty.
G.Ábdiqalyqova ǵalymdar, óndiris jańashyldary, ǵylymı-tehnıkalyq zııaly qaýym ókilderi el ekonomıkasyn damytýǵa, ulttyń zııatkerlik áleýetin nyǵaıtýǵa eleýli úles qosyp otyrǵanyn atap ótti.
– Álem búginde jedel ózgerýde. Joǵary tehnologııalar, tyń ǵylymı jańalyqtar, ǵylymdy qajet etetin ozyq óndirister – osynyń barlyǵy álem elderin ózgeristerge beıimdelip, ınnovasııalyq jobalardy ınvestısııalaýǵa, básekege qabiletti bolýǵa jeteleıdi. Sondyqtan ǵylym men tehnıkanyń damýyna turaqty túrde qarjy bólip otyratyn memleketter óz halqynyń ál-aýqatyn jaqsartyp, jahandyq ınnovasııalyq trendten qalyspaıtyn bolady, – dedi Memlekettik hatshy.
G.Ábdiqalyqova Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy memlekettik syılyǵy ǵylym men tehnıka qaıratkerleriniń eńbegine qoǵam men memleket tarapynan berilgen joǵary baǵa ekenin atap ótti. Eki jylda bir ret 7 syılyqqa deıin beriledi. 2017 jyly memlekettik syılyq laýreatyna beriletin qarjylaı bir syıaqy mólsheri – 18 600 000 teńge. Syılyqqa barlyǵy 24 jumys usynylǵan. Aldyn ala irikteýden keıin solardyń 11-i ekinshi kezeńge ótti.
Otyrystyń qorytyndysy boıynsha Komıssııa Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy 2017 jylǵy memlekettik syılyǵyn berý úshin Memleket basshysynyń qaraýyna usynylatyn jumystardyń tizimin aıqyndady.
Qazaqstan Respýblıkasynyń Prezıdenti ál-Farabı atyndaǵy ǵylym men tehnıka salasyndaǵy memlekettik syılyqty Táýelsizdik kúni qarsańynda tapsyrady.
