Jıynda aımaq basshysy ekonomıkanyń damýyna Údemeli ındýstrıaldy-ınnovasııalyq damý baǵdarlamasy tyń serpin bergenin áńgimeledi. Baǵdarlama aıasynda onda 20 joba júzege assa, onyń 16-sy tolyq qýattylyǵynda jumys istep tur. Qyzylordada sońǵy jylda ÚIIDB kásiporyndary óndirgen ónim eksporty 23 paıyzǵa artyp, ımporttaýshy memleketter sany 8-den 11-ge jetken.
«Júzege asyrylǵan jobalardyń sapasyn arttyrý maqsatynda biz Indýstrııalandyrý kartasyna túgendeý júrgizip, tıimsiz jáne eksporttyq áleýeti tómen, básekege qabiletsiz jobalardy alyp tastadyq. Qalǵan jobalar boıynsha naqty jumys atqarylýda. Máselen, keler jyly oblysta molıbden úsh totyǵyn shyǵaratyn kásiporyn iske qosylady. О́nim eksportynyń negizgi kólemi Japonııanyń úlesinde bolady. Aldaǵy jyldyń shilde aıynda shyny zaýytynyń alǵashqy ónimin shyǵarýdy kózdep otyrmyz. Sondaı-aq, keler jyly qurylys salasynda ǵana emes, munaı-gaz jáne ýran óndirýde keńinen qoldanylatyn tamponajdy sement shyǵaratyn zaýytty da iske qosamyz», dedi oblys ákimi. Bul kásiporyndardyń barlyǵynyń eksporttyq áleýeti joǵary, jańa tehnologııalar engizilgen.
Qyrymbek Eleýulynyń sózine qaraǵanda, aımaq damýynda oń dınamıka bar, iri jobalar júzege asýda. «Brıtandyq ınvestorlarmen birlesip «Balasaýysqandyq» vanadıı ken ornynda qara taqta tasty avtoklavta óńdeıtin joba júzege asyrylýda. 110 tonna ammonıı metavanadatyn Taıvanǵa eksporttap úlgerdik. Budan bólek, qazir Qyzylordada ferroqorytpa zaýytyn salý jobasyn iske asyrý baǵytynda jumys istelýde. Qyrkúıek aıynyń sońynda túrkııalyq «Yıldızlar SSS Holding» kompanııasymen birlesip, 2 iri nysan qurylysyn bastaý týraly sheshim qabyldanǵan edi. Onyń biri – jyldyq qýattylyǵy 27 mln sharshy metr keramıkalyq taqta jáne keramogranıt shyǵaratyn zaýyt, ekinshisi – qýattylyǵy 138 MVt/saǵ bolatyn gaz porshendi stansasy. Keramıkalyq taqta shyǵaratyn zaýyt osy ónimdi jasaıtyn Qazaqstandaǵy iri óndiris orny bolady. Al, gaz porshendi elektr stansasynyń iske qosylýy elektrmen qamtamasyz etýdi jaqsartyp, aımaqta ónerkásiptiń damýyna múmkindik beredi», dedi ákim.
Ashat RAIQUL,
«Egemen Qazaqstan»
