«Turǵyndardyń kabınetten kabınetke júgirip, sendelmeı-aq, «bir tereze» ustanymymen bir jerden quqyqtyq qyzmet kómegine júginýine múmkindik týdy. Kelýshilerge notarıýs, advokat, medıator, salyq salasy qyzmetkerleriniń, psıholog mamandardyń kómegi kórsetiledi. Bul azamattardyń memlekettik jáne quqyq qorǵaý organdaryna senimin arttyrý bolyp tabylady. Budan bylaı qylmystyq prosesterdi elektrondyq sıfrlandyrý júrgiziledi de, azamattar osy aradan-aq kómek ala alatyn bolady, – dedi Marat Muratuly.
Oblys ákimi Arhımed Muhambetov jańa ortalyqtyń quqyq qorǵaý qyzmetiniń barlyq salasy boıynsha turǵyndarǵa kómegi zor bolatynyna senimdi ekenin aıtty. Ortalyqtyń ashylýyna oblystyq ákimıat zor qoldaý bildirdi, ǵımaratty jóndep, jabdyqtaýǵa 13 mıllıon teńge qarjy jumsaldy. Bul ortalyq turǵyndardyń quqyq qorǵaý salasyna, jergilikti atqarý bıligine senimin arttyrady. Sondaı-aq óńir basshysy mundaı ortalyqtar oblystyń basqa da aýdan-qalalarynda ashylatynynan habardar etti.
Ortalyq elektrondy kezek júıesimen qamtamasyz etilgen. Al ýaqyt joǵaltpaý úshin «Azamattarǵa arnalǵan úkimet» memlekettik korporasııasy usynatyn elektrondy formattaǵy qyzmet alýǵa múmkindik bar. Kezekshi prokýrorlar aýmaqtyq bólimsheler men basqa da ókiletti organdardan negizgi qajetti aqparattardy jedel alýǵa ortalyqta múmkindik jasalǵan. Oblys prokýrorynyń birinshi orynbasary Marat Ábishevtiń aıtýynsha, bul respýblıkadaǵy quqyq qorǵaý qyzmetin kóresetetin tórtinshi ortalyq bolyp tabylady. Al aldaǵy ýaqytta taıaý arada munda elimizde birinshi ret onlaın-rejım iske qosylatyn bolady. Ortalyqta segiz kabınet kelýshilerge túrli quqyqtyq qyzmet kórsetedi.
Quqyq qorǵaý qyzmetteri ortalyǵy Qostanaı qalasynyń Tolstoı kóshesindegi 57 úı, ıaǵnı qalalyq prokýratýranyń ǵımaratynda ornalasqan.
Názıra Járimbet,
«Egemen Qazaqstan»
Qostanaı
Sýretterdi túsirgen Baǵdat Ahmetbekov.
