Alqaly jıynda qazaqstandyq ǵalymdar men joǵary oqý oryndarynyń professor-oqytýshylary Memleket basshysy kótergen bastamalar negizinde Qazaqstandy jańǵyrtýdyń máselelerin ǵylymı negizderge súıene otyryp talqyǵa saldy. Sonymen qatar, konferensııaǵa qatysýshylar baǵdarlamalyq maqalanyń ıdeıalaryn júzege asyrý men bilim berý qyzmetiniń sapasyn arttyrý joldary jáne «Máńgilik elge» aınalý ıdeıasynyń sheshýshi baǵyttary da áńgime ózegine aınaldy.
– Buǵan deıin táýelsiz Qazaqstannyń tól tarıhynda ulttyq sanany jańǵyrtý sııaqty asa aýqymdy ári tereń mindet turmaǵan edi. «Rýhanı jańǵyrý» – memlekettik barlyq salalarynyń sapalyq turǵydan jańarýyna negizgi irgetas bolatyn ıdeıalyq tuǵyrnama. Halyqtyń tarıhy, tili, mádenıeti, salt-dástúri – rýhanı qundylyqtarymyzdyń qaınar bastaýy. Ata-babalarymyzdyń ulttyq kodyn bizge jetkizetin – qazaqtyń mádenı álemi. Ol – burynǵy ótken ǵalymdardyń jumystary, epıkalyq muralar, mýzyka, arhıtektýralyq eskertkishter. Qazirgi kúnde osy qundylyqtardyń barlyǵy qaıta jańǵyrtylyp, saqtalýda, – dedi jıynǵa qatysýshylar.
Konferensııa jumysy «Qazaqstan Respýblıkasynyń qazirgi ǵylym men bilimniń ózekti máseleleri», «Mektepke deıingi, bastaýysh jáne jalpy orta bilim berýdiń ózekti máseleleri», «Oqý úrdisindegi jańa ınnovasııalyq tehnologııalar jáne úsh tildi bilim berýdi júzege asyrý» jáne «Robototehnıka salasyndaǵy quzyrettilikter» baǵyttary boıynsha júrgizildi.
Keńes jumysy barysynda ǵalymdar men sarapshylar arasynda «Rýhanı jańǵyrý» baǵdarlamasynyń sheshýshi baǵyttaryn iske asyrý barysyn talqylaý boıynsha keleli suhbat órbidi. Qatysýshylar qoǵamdyq sanany jańǵyrtý sheńberinde júrgizilip jatqan keshendi jumysty keńinen nasıhattap, naqty qorytyndy shyǵarýda osy taqilettes jıyndardyń mańyzy zor ekenin atap ótti. Konferensııada L. Gýmılev atyndaǵy Eýrazııa ulttyq ýnıversıtetiniń dosenti Sánim Qojaeva «Qazaqstanda ǵylym men bilimdegi ıntegrasııasynyń damý barysy», Abaı atyndaǵy Qazaq Ulttyq pedagogıkalyq ýnıversıtetiniń professory Qundyz Aganına «Bilim berý júıesinde menedjerlerdi daıyndaý», Qoja Ahmet Iаssaýı atyndaǵy HQTÝ-dyń dosenti Tursynaı Qoıshıeva «Bolashaq oqytýshylardyń tanymdyq is-áreketterin baǵdarly jobalaý negizinde qalyptastyrý» taqyryptarynda paıymdy pikirlerimen bólisti.
Sondaı-aq, shara aıasynda Qyzdar ýnıversıtetiniń professor-oqytýshylary men stýdentteriniń ǵylymı jetistikteriniń kórmesi uıymdastyryldy.
