El óńirlerine kómir jóneltilimin qamtamasyz etý úshin vagondar sany jetkilikti ekenin áńgimelegen ol qańtar-qazan aılary aralaǵynda kompanııa 83,9 mıllıon tonna kómir tasymaldaǵanyn aıtty. Bul ótken jylǵy deńgeıden 11 mıllıon tonnaǵa nemese 15 paıyzǵa artyq.
«Qazaqstandyq tutynýshylarǵa 56,6 mıllıon tonna otyn tasymaldandy. Bul – ótken jylǵy deńgeıden 17 paıyz kóp. Endi jyl sońyna deıin 107 mıllıon tonna kómir tasymaldaý josparlanyp otyr. Bul kórsetkish te byltyrǵy deńgeıden 17 paıyzǵa joǵary», dedi Oralhan Raıhanuly. Onyń aıtýynsha, qazirgi kezde «Qazaqstan temir joly» ulttyq kompanııasy parkine «QazTemirTrans» AQ ashyq vagondar parki tartylǵan. Olardyń úlesi elimizdegi ashyq vagondardyń jalpy parkiniń 40 paıyzdan astamyn quraıdy.
«Kómir qorlaryn ýaqtyly jınaý boıynsha ákimdiktermen birlese júrgizilgen jumystardyń arqasynda barlyq jylý-elektr stansalary qajetti kómir qorymen qamtamasyz etildi. Kommýnaldyq-turmystyq kómirdiń jetispeýshiligi tóńiregindegi ahýal halyqqa arnalǵan kómirdi satyp alý jáne bólýmen kásipkerlik qurylymnyń aınalysýynan týyndaýda. Keı jaǵdaıda olardyń jekemenshik vagondary, kómirdi saqtaý jáne teńdeı bólý úshin qajetti qoımalary joq», degen kompanııa basshysy aldaǵy ýaqytta kómir tapshylyǵyna qatysty mundaı jaıt oryn almaý úshin halyq otyndy mamyr aıynan bastap satyp alýy qajet ekenin jetkizdi.
Basqosýda belgili bolǵandaı, kómir jetkizýge baılanysty jaǵdaı kúndelikti jiti qadaǵalanyp otyrady. Ár tapsyrystyń qamtamasyz etilýine táýlik boıy baqylaý jasalady, kommýnaldyq-turmystyq sala da nazardan tys qalmaıdy.
Ashat RAIQUL,
«Egemen Qazaqstan»
