Úkimet basshysy áýeli Taraz qalasyndaǵy jańadan salynǵan «Araı» shaǵyn aýdanynyń kópqabatty turǵyn úıleriniń qurylysyn kórip, óńirde «Nurly jer» turǵyn úı qurylysy baǵdarlamasynyń iske asyrylý barysymen tanysty. Baqytjan Ábdirulyna Jambyl oblysy ákiminiń orynbasary Ǵalymjan Ábdiraıymov qurylystyń qazirgi jaǵdaıy men keleshegi jóninde baıandaı kele, bıylǵy jyly oblysta «Nurly jer» memlekettik baǵdarlamasy boıynsha 17,7 myń m2-qa 258-den astam páterdi paıdalanýǵa berý boıynsha tórt joba iske asyrylyp jatqanyn, sonymen qatar jeke turǵyn úı qurylysy boıynsha 922 jer telimi bólingenin, al keler jyly 13 kópqabatty turǵyn úı qurylysyn aıaqtaý nemese 1070 páterdi paıdalanýǵa berý kózdelgenin aıtyp ótti. Jalpy, aǵymdaǵy jyldyń 10 aıynda elimizde qurylys qarqynynyń kórsetkishteri ótken jyldyń osy kezeńimen salystyrǵanda 1,8 paıyzǵa jaqsarǵan. Sondaı-aq, barlyǵy 8,8 mıllıon m2 turǵyn úı paıdalanýǵa berilgen.
Budan keıin Premer-Mınıstr olımpıada rezervin daıyndaıtyn «Atletık» oqý-jattyǵý keshenine bardy. Munda 2 myńnan astam sportshy grek-rım kúresimen, kıkboksıngpen, taekvondomen, armrestlıngpen jáne sporttyń ózge de túrlerimen aınalysady. Bul jerde Úkimet basshysyna oblysta sportty damytý keleshegi týraly baıandaldy. Aıta keteıik, búgingi tańda Jambyl oblysynda ornalasqan 46 sport mekemesinde 22 myńǵa jýyq sportshy júıeli túrde túrli sport túrlerimen aınalysady.
Jambyl oblysyna jumys sapary barysynda Premer-Mınıstr Baqytjan Saǵyntaev óńirdegi iri kásiporyn «Qazfosfat» jaýapkershiligi shekteýli seriktestiginiń elimizdegi jalǵyz mıneraldy tyńaıtqyshtar zaýytyn aralap kórdi. Atalǵan hımııa zaýyty aýyl sharýashylyǵyna arnalǵan mıneraldy tyńaıtqyshtar men jemshóptik ftorsyzdandyrylǵan fosfattar óndiredi. Úkimet basshysyna «Qazfosfat» jaýapkershiligi shekteýli seriktestiginiń bas dırektory Muqash Eskendirov elimizdiń ındýstrııalyq-ınnovasııalyq damý baǵdarlamasy aıasynda ótken jyly zaýytty qaıta jóndeý óndiris kólemin 2 esege arttyrýǵa múmkindik bergenin, aǵymdaǵy jyly 300 myń tonna fosforly mıneraldy tyńaıtqyshtar óndirilgenin, al óndirilgen ónimniń 108 myń tonnasy Qazaqstannyń qajettilikterin 100 paıyz qamtı otyryp, ishki naryqta ótkiziletinin baıandady. Sonymen qatar, mundaǵy 200 myń tonnaǵa jýyq ónim Qytaı, Reseı, Aýǵanstan, Ýkraına, Ýrýgvaı jáne Argentına elderine eksporttalsa, búgingi tańda zaýytta Rýmynııa, Chehııa, Bolgarııa, Iran naryqtaryn ıgerý jumystary júrgizilýde. Al keler jyly fosforly mıneraldy tyńaıtqyshtar óndirisi kólemin 500 myń tonnaǵa deıin ulǵaıtý josparlanǵan. Budan keıin Jambyl oblysy ákiminiń orynbasary Tımýr Janke ındýstrııalyq-ınnovasııalyq damý baǵdarlamasynyń Indýstrııalandyrý kartasy aıasynda aǵymdaǵy jyly óńirde 1448 jańa jumys ornyn qura otyryp, 18,8 mıllıard teńgege 13 jobany iske asyrý josparlanǵanyn aıtyp ótti. Jyl basynan beri óńirde 8,3 mıllıard teńgege 6 joba engizilip, 398 jumys orny qurylǵan.
Sondaı-aq, Baqytjan Ábdiruly oblystyq perınataldyq ortalyqta boldy. Ortalyqty aralaý barysynda Úkimet basshysyna oblystyq densaýlyq saqtaý basqarmasynyń basshysy Marat Jumanqulov óńirde densaýlyq saqtaý júıesin damytý boıynsha qabyldanyp jatqan sharalar týraly baıandady. Halyqaralyq talaptardy eskere otyryp 2015 jyly salynǵan jańa klınıka bir ýaqytta 200 emdelýshige qyzmet kórsetetin qajetti zamanaýı jabdyqtarmen jaraqtandyrylǵan.
О́ńirge jumys sapary barysynda Premer-Mınıstr Baqytjan Saǵyntaevtyń tóraǵalyǵymen M.H.Dýlatı atyndaǵy Taraz Memlekettik ýnıversıtetinde aýylsharýashylyǵy óndiristik kooperatıvin damytý jóninde jeke keńes ótti. Munda Úkimet basshysy óńirlik kásipkerlermen jáne elimizdegi birqatar sharýa qojalyqtarynyń jetekshilerimen kezdesip, atalǵan salanyń básekege qabilettiligin arttyrý máselesine basa nazar aýdardy. Sondaı-aq, Baqytjan Ábdiruly aýylsharýashylyǵy salasynyń básekege qabilettiligin arttyrý úshin áýeli sapaly ónimniń kerektigin, sondaı-aq et eksporty máselesin qolǵa alý qajettigin aıtyp ótti. «Bizdiń elimiz búgingi tańda tıimdi aýmaqta tur. Sondyqtan aýylsharýashylyǵy salasynyń básekege qabilettiligin arttyrý úshin sapaly ónim kerek. Eger ónim sapaly bolmasa, ony eshkim almaıdy. Al sapaly ónim shyǵarý úshin eń birinshi kezekte ǵylymdy damytý qajet», dedi Premer-Mınıstr.
Budan keıin Jambyl oblysynyń ákimi Kárim Kókirekbaev oblystyń agroónerkásip kesheniniń búgingi jaı-kúıi jáne ony damytý perspektıvalary jóninde sóıledi. О́z sózinde ákim óńirdiń aýylsharýashylyǵy salasy jyl sanap damý ústinde ekenin, buǵan Agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasynyń iske asyrylýy oń septigin tıgizip otyrǵanyn aıtyp ótti. «Baǵdarlama aıasynda bıylǵy jyly salany damytýǵa 16 mıllıard teńgeden astam qarjy bólindi. Memlekettik qoldaýdyń nátıjesinde, búgingi kúni 220 mıllıard teńgeniń ónimi óndirilip, ónim kólemi 3,6 paıyzǵa artty. Keler jylǵa oblystyń aýyl sharýashylyǵyn damytýǵa jergilikti bıýdjetten 10,5 mıllıard teńge qarastyrý josparlanýda», dedi ákim.
О́z sózinde Qazaqstan Respýblıkasy Aýyl sharýashylyǵy mınıstriniń birinshi orynbasary Qaırat Aıtýǵanov aýyl sharýashylyǵyn qoldaýdyń memlekettik baǵdarlamasy aıasynda elimizdegi atqarylǵan jumystardyń 10 aılyq qorytyndysyn baıandady. Sonymen qatar, «Keń dala» sharýa qojalyǵynyń jetekshisi Qalıbek Alpysbaev qant qyzylshasyn egýde memleket tarapynan kórsetilip otyrǵan qoldaý týraly aıtsa, «Merke Et» jaýapkershiligi shekteýli seriktestiginiń dırektory Berik Egemberdıev et eksporty týraly áńgimeledi. Aıta keteıik, atalǵan kombınat bıylǵy jyly Birikken Arab Ámirliginiń Bahreın Koroldigine 22 tonna, Iran memleketine 123 tonna qoı etin jiberdi. Al «Aqtóbe ı K» jaýapkershiligi shekteýli seriktestiginiń dırektory Nurlan Izdibaev tehnıka alý úshin memlekettik nesıelendirý barysyna toqtaldy. Sondaı-aq, jıyn barysynda Almaty oblysy ákiminiń orynbasary Serikjan Beskempirov, Jambyl oblysy ákiminiń orynbasary Máden Musaev, Ońtústik Qazaqstan oblysy ákiminiń orynbasary Darhan Satybaldy jáne Qyzylorda oblysy ákiminiń orynbasary Serik Qojanııazovtar óńirlerdegi aýyl sharýashylyǵy salasynyń damýy týraly baıandady.
Jumys saparynyń ekinshi kúni Premer-Mınıstr Baqytjan Saǵyntaev «Atameken» Kásipkerler palatasynyń О́ńirlik keńesi múshelerimen kezdesý ótkizdi. Kezdesý barysynda ónimdi jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy, «Bıznestiń jol kartasy-2020» jáne ındýstrııalyq aımaqtar men monoqalalardy damytý baǵdarlamalaryn iske asyrý máseleleri talqylandy. Búgingi tańda memlekettik qoldaý sharalaryn kórsetý aıasynda 800 mıllıard teńgeden astam qarajatqa 13 myńnan astam bıznes joba jaraqtandyrylǵan. Al ataýly mólsherlemesi 6 paıyzdan aspaıtyn 18 mıllıon teńgege deıin shaǵyn nesıeler usynylady. Sondaı-aq, bıznesti qaıta retteý boıynsha zańnamalyq sharalar qabyldanýda. Sonymen qatar, lısenzııalar men ruqsattar sany 3 eseden astam qysqarǵany da aıtyldy. Keńeste memlekettik-jekeshelik áriptestikti damytý máseleleri de talqylanyp, jergilikti atqarýshy organdarmen ózara is-qımyl tetikterin jetildirý boıynsha kásipkerlerdiń usynystary tyńdaldy. Al «Atameken» ulttyq kásipkerler palatasy basqarma tóraǵasynyń orynbasary Tólemis Shotanov elimizdegi shaǵyn jáne orta bıznesti damytýdyń aǵymdaǵy jaǵdaıy týraly aıtty. Kezdesý barysynda kásipkerler qoıǵan suraqtarǵa Qazaqstan Respýblıkasy Energetıka vıse-mınıstri Maǵzum Myrzaǵalıev, Jambyl oblysynyń ákimi Kárim Kókirekbaev, Aýyl sharýashylyǵy birinshi vıse-mınıstri Qaırat Aıtýǵanov, ulttyq ekonomıka vıse-mınıstri Aıbatyr Jumaǵulov jáne Taraz qalasyndaǵy «Áýlıe-Ata» halyqaralyq áýejaıynyń dırektory Dáýlet Hamzın jaýap berdi. Jıyndy qorytyndylaı kele Premer-Mınıstr Baqytjan Saǵyntaev jaýapty tulǵalarǵa shaǵyn jáne orta bıznes ókilderiniń barlyq máseleleri men usynystaryn baqylaýǵa alýdy jáne atalǵan baǵytta keshendi jumystar júrgizýdi tapsyrdy.
Hamıt Esaman,
«Egemen Qazaqstan»
Jambyl oblysy
