«Bir shańyraq astynda ósip-ónip, bildeı shenge birdeı qol jetkizgen aǵaıyndy qyzdar Shyńǵys han jurtynyń tarıhynda buryn-sońdy bolmaǵan» dep jazyp jatyr mońǵolııalyq aqparat quraldary.
Polkovnıkterdiń ákesi Qaýsylǵazy Musabaıuly pedagogıka ǵylymdarynyń doktory, ǵalym adam. Jazǵan eńbekteri dál qazir qurlyq asyp, sonaý Amerıka mektepterinde oqytylyp júr. Anasynyń esimi – Qaıyrnısa Jálelqyzy. Otbasynda – tórt ul, eki qyz.
Úıdiń úlkeni – Anargúl Qaýsylǵazyqyzy 70-jyldardyń sońynda Peterbordaǵy S.M. Kırov atyndaǵy áskerı-medısına akademııasyn bitirgen eken. Mamandyǵy áskerı dáriger. Uzaq jyl áskerı medısına salasynda qyzmet atqaryp, 1987 jyly ózi oqyǵan akademııada kandıdattyq dıssertasııasyn qorǵap, sońynan Ulan-Batyrdaǵy Qorǵanys ýnıversıtetinde medısına ǵylymdarynyń doktory ǵylymı ataǵyn alypty. Sonymen qatar ótken jyly Anargúlge «Eńbek sińirgen dáriger» ataǵy da berilgen eken.
Al ekinshi polkovnık Anargúldiń týǵan sińilisi Jeńisgúl Ulan-Batyrda Keńes Odaǵy ofıserleriniń balalary oqıtyn №8 orys orta mektebin bitirgen. Jıyrma jasynda Mońǵolııa Ishki ister mınıstrliginiń qatardaǵy bólimine hatshylyq qyzmetke ilikken qyz úsh jyl ishinde ofıserlik quramǵa ótip, «hatshylyqtan bastap polkovnıkke jetken» ańyz adam retinde tarıhta aty qaldy.
Jeńisgúl 1998 jyly Reseı Federasııasynyń baıyrǵy oqý oryndarynyń biri – Reseı Ishki ister mınıstrligine qarasty Peterbor ýnıversıtetinde doktorlyq dıssertasııa qorǵapty. J.Qaýsylǵazyqyzy ózi qyzmet etken salanyń jedel tergeý-tekserý isi boıynsha uzaq jyl abyroıly eńbek etip, sońǵy jyldary qazaqtar kóp qonystanǵan Baı-О́lke aımaqtyq ishki ister basqarmasyn basqardy. Qazir zeınet demalysynda.
Beken QAIRATULY,
«Egemen Qazaqstan»
