– Rasynda, ózińiz aıtqandaı, bıylǵy jyly quqyq qorǵaý jáne basqa da memlekettik organdar arasynda úshinshi ret ótkizilip otyrǵan vedomstvoaralyq respýblıkalyq baıqaýdyń negizgi maqsaty – otanshyldyq rýh pen patrıottyq sana-sezimdi kúsheıtý. «Eshkim ishten batyr bolyp týmaıdy: batyrlyq ta, minez sekildi ósken orta, kórgen tárbıege baılanysty qalyptasady», dep bizge batyrlyq pen batyldyqtyń úlgisi bola bilgen Baýyrjan Momyshuly aıtqandaı, Otandy qorǵaý – ár azamattyń paryzy. Al Otanǵa degen súıispenshilikti qalyptastyrý adamnyń ómirge kelgen sátinen bastalyp, otbasynda osy uǵym bala boıyna sińirilip, túsindirilýi tıis. Sonda ǵana kez kelgen adam eli men halqynyń, qala berdi óz otbasynyń qaýipsizdigi men keleshegi óziniń qolynda ekenin túsinetin bolady.
Soǵan oraı sonaý 2014 jyldan bastaý alǵan bul shara buryn «Til – tatýlyq tiregi», «Til – tutastyq kepili» dep ataldy. Endi Memleket basshysynyń rýhanı jańǵyrýǵa shaqyrǵan qoǵam úshin asa qundy «Bolashaqqa baǵdar: rýhanı jańǵyrý» maqalasyna saı bıylǵy jyly ony «Rýhanı jańǵyrý – patrıotızm negizi» degen ataýmen ótkizgeli otyrmyz. Negizgi maqsaty – Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn nasıhattaý men patrıottyq rýhty kúsheıtýge qadam jasaý. Baıqaýǵa memleketimizdiń alty organy qatysady. Olar: Bas prokýratýra, Ulttyq qaýipsizdik komıtetiniń Shekara qyzmeti, Memlekettik kúzet qyzmeti, Memlekettik qyzmet isteri jáne sybaılas jemqorlyqqa qarsy is-qımyl agenttigi, Ishki ister mınıstrligi, Qorǵanys mınıstrligi. Bıylǵy saıys eki týrdan quralady. Memlekettik mekemeniń rýhanı jańǵyrý boıynsha atqarǵan isteriniń tanystyrylýy men «Rýhanı jańǵyrý – patrıotızm negizi» degen ataýmen teatrlandyrylǵan sahnalyq qoıylym qoıylady. Ár mekemeniń qyzmetkeri ózderine qoıylǵan talaptyń mańyzdylyǵyn tereń sezinip, daıyndyqqa erekshe mán berýde.
Til qaı elde, qaı jerde, qaı halyqta bolsyn qashanda óz qundylyǵyn joǵaltqan emes. Qazaq balasynyń óz halqyn qurmettep, elin súıýi úshin, ol ana tilin qurmetteýi kerek. Elin súıý – ol eliniń patrıoty bolý. Otan aldyndaǵy paryz, abyroı jáne halyqqa adaldyq – qaı ýaqytta da osy mekeme qyzmetkerleri úshin kúmánsiz baǵdar. Joǵary patrıottyq sanany dáripteý memleket jáne quqyq qorǵaý organdary úshin asa mańyzdy mindetterdiń biri bolyp tabylady. Etnıkalyq jáne dinı ereksheligine qaramastan árbir azamat elmen birtutastyǵyn sezinýi, baýyrmal halyqtyń bir bóligi ekendigin túsinýi qajet. Oıymdy Baýyrjan Momyshulynyń «Naǵyz jaýyngerdiń qasıetterin tárbıeleýde dástúrler, patrıotızm men tártiptiń zor maǵynasy bar», degen sózimen túıindegim keledi.
Jazyp alǵan
Aleksandr TASBOLAT,
«Egemen Qazaqstan»
