Kelissóz barysynda Nursultan Nazarbaev eki memleket arasyndaǵy qarym-qatynastardyń táýelsizdik jyldary strategııalyq jetistikterge jetkenin atap ótti. «Belarýs tarapynan eki memlekettiń saýda aınalymy men seriktestigin joǵary deńgeıge jetkizý úshin kóp jumys atqaryldy. Biz seriktestiktiń eń joǵary deńgeıine jettik. Memleketterimizdiń arasynda eshqandaı saıası, ekonomıkalyq nemese basqa da máseleler joq. Bul birge tyǵyz jumys isteýge zor múmkindik dep oılaımyn», dedi Qazaqstan Prezıdenti.
Nursultan Nazarbaev Qazaqstanda 6 avtokólik qurastyrý zaýytynyń jumys isteıtinin atap ótti. «Búgin biz osy kúnge deıin ornaǵan seriktestigimizdi odan ári damytý máselelerin talqylap, yntymaqtastyq deńgeıin arttyrý týraly aıtatyn bolamyz. Al bıznes-forým aıasynda qol qoıylatyn kelisimsharttar soǵan septigin tıgizedi dep oılaımyn», dedi Elbasy. Sonymen qatar Nursultan Nazarbaev Belarýs tarapynyń bıdaı jınaýǵa arnalǵan tehnıkalardy birlesip qurastyrý týraly usynysyn qoldaıtynyn aıtty.
Kelissóz barysynda Aleksandr Lýkashenko áleýmettik-ekonomıkalyq seriktestiktiń 2026 jylǵa deıingi baǵdarlamasy eki memlekettiń yntymaqtastyǵyn arttyra túsetinine senim bildirdi. Sonymen qatar ol Belarýs elinde 500-den astam qazaqstandyq bilim alyp jatqanyn aıtty. «Biz mádenıet, bilim, ǵylym salasynda da ekijaqty seriktestikti arttyrýǵa daıynbyz», dedi Aleksandr Lýkashenko. Onyń aıtýynsha, Qazaqstan Belarýs memleketiniń tranzıt boıynsha da mańyzdy seriktesi bolyp qala beredi. «Eki memleket arasynda yntymaqtastyq bul salalarmen shektelmeıdi. Mysaly, Qazaqstandaǵy alǵashqy baýyr transplantasııasy operasııasyna Belarýs mamandary qatysty», dedi Aleksandr Lýkashenko. Onyń aıtýynsha, eki memleket arasyndaǵy qazirgi yntymaqtastyq deńgeıin arttyryp, ony urpaqtan-urpaqqa jetkize berý kerek.
Kelissózder barysynda Aleksandr Lýkashenko mádenıet kúnderin jıi ótkizip turýǵa shaqyrdy. «Bul Qazaqstan men Belarýs halqyna bir-biriniń tarıhyn, mádenıetin, salt-dástúrin jaqynyraq tanýǵa múmkindik beredi», dedi ol.
Kezdesýge Qazaqstan tarapynan Syrtqy ister mınıstri Qaırat Ábdirahmanov, birinshi vıse-premer Asqar Mamın, Qazaqstan Prezıdentiniń kómekshisi Nurlan Onjanov, mádenıet jáne sport mınıstri Arystanbek Muhamedıuly, aqparat jáne kommýnıkasııalar mınıstri Dáýren Abaev, ınvestısııalar jáne damý mınıstri Jeńis Qasymbek, qorǵanys jáne aeroǵarysh óndirisi mınıstri Beıbit Atamqulov, Qazaqstannyń Belarýs Respýblıkasyndaǵy elshisi Ermuhamet Ertisbaev, «Qazaqstan Temir Joly» basshysy Qanat Alpysbaev, Prezıdent ákimshiliginiń syrtqy saıasat ortalyǵy basshysy Ádil Tursynov qatysty.
Keńeıtilgen kelissózder aıasynda Qazaqstan Prezıdenti Nursultan Nazarbaev pen Belarýs Prezıdenti Aleksandr Lýkashenko eki el arasyndaǵy áleýmettik-ekonomıkalyq yntymaqtastyq týraly shart pen 2026 jylǵa deıingi yntymaqtastyq baǵdarlamasyna, QR Syrtqy ister mınıstri Q.Ábdirahmanov pen BR Syrtqy ister mınıstri V.Makeı QR men QR Syrtqy ister mınıstrlikteri arasyndaǵy 2018-2019 jyldarǵa arnalǵan yntymaqtastyq josparyna, QR Aqparat jáne kommýnıkasııalar mınıstri D.Abaev pen BR Aqparat mınıstri A.Karlıýkevıch QR Úkimeti men BR Úkimetteri arasyndaǵy buqaralyq aqparat quraldary salasyndaǵy yntymaqtastyq týrally kelisimge, QR Qorǵanys jáne aeroǵarysh ónerkásibi mınıstri B.Atamqulov pen BR Memlekettik áskerı-ónerkásiptik komıteti tóraǵasy O.Dvıgalev QR Úkimeti men BR Úkimeti arasyndaǵy ónerkásiptiń qorǵanys salasyndaǵy uıymdarynyń óndiristik jáne ǵylymı-tehnıkalyq kooperasııalary týraly kelisimge, QR Mádenıet jáne sport mınıstri A.Muhamedıuly men BR Sport jáne týrızm mınıstri A.Shamko QR Mádenıet jáne sport mınıstrligi men BR Sport jáne týrızm mınıstrligi arasyndaǵy 2018-2019 jyldarǵa arnalǵan dene tárbıesi jáne sport salasyndaǵy yntymaqtastyq baǵdarlamasyna, QR Mádenıet jáne sport mınıstri A.Muhamedıuly men BR Mádenıet mınıstri Iý.Bondar QR Mádenıet jáne sport mınıstrligi men BR Mádenıet mınıstrligi arasyndaǵy mádenı yntymaqtastyq boıynsha ózara túsinistik týraly memorandýmǵa, QR UǴA prezıdenit M.Jurynov pen BR UǴA tóralqasynyń tóraǵasy V.Gýsakov QR Ulttyq ǵylym akademııasy men BR Ulttyq ǵylym akademııasy arasynda ǵylymı-tehnıkalyq yntymaqtastyq týraly kelisimshartqa qol qoıdy
Gúlnur Qýanyshbekqyzy,
«Egemen Qazaqstan»
Mınsk
