Eger osy aıtylǵan tujyrymdy Aqtóbe oblysy mysalynda odan ári naqtylaı túser bolsaq, esepti kezeń ishinde aımaq ekonomıkasyn odan ári damytýǵa tartylǵan ınvestısııa mólsheri 313 mıllıard teńgeden asyp túsedi. Salystyrmaly túrde alǵanda bul joǵary soma, bıik kórsetkish. Osy arqyly Aqtóbe ınvestısııa tartýda respýblıka oblystary arasynda eń aldyńǵy qatarǵa shyǵyp otyr.
Mol ınvestısııalyq qarajat óz kezeginde aımaqta ındýstrııalyq-ınnovasııalyq damý baǵdarlamasyn jańa sapalyq deńgeıge kótere bildi. Bul baǵytta atalǵan baǵdarlama sheńberindegi ekinshi besjyldyq aralyǵynda alynǵan asýlar arshyndy. Dál osy tusta tartylǵan ınvestısııa kólemi 127 mıllıard teńgeni qurapty. Osy arqyly 2000-ǵa jýyq jańa jumys ornyn qurýǵa múmkindik týyp, jıyrmaǵa jýyq jobanyń tusaýy kesilipti.
Sondaı-aq Indýstrııalandyrý kartasy aıasynda atqarylǵan jobalar kólemi de kóńilden shyǵady. Munyń ishinde EKSPO-2017-niń ınnovasııalyq jobalaryn óndiriske engizý jónindegi bastamalardyń orny aıryqsha. Osyǵan oraı oblysta jalpy quny 43 mıllıard teńgeniń 18 jobasy iriktelgen. Búgingi kúni onyń árqaısysyna qatysty jan-jaqty jobalaý jumystary júrgizilýde. Atap aıtqanda, bulardyń qatarynda ónerkásip, munaı-gaz óndirisi jáne aýyl sharýashylyǵy salasynda qaldyqtardy qaıta óńdeý sekildi ómirsheń jobalar jasalǵan.
Osyndaı jetistikter men tabystarda «Aqtóbe» ındýstrııalyq aımaǵynyń eleýli úlesi bar. Qazirgi kezde onyń qurylǵanyna 2 jyl tolyp otyr. О́ńir ındýstrııasynyń ón boıyna qan júgirtip otyrǵan qurylymnyń jalpy aýmaǵy 200 gektardy quraıdy. Búgingi tańda munda qyzmet jasap júrgen kásiporyndardyń deni óz jobalaryn shetel kapıtaly negizinde júzege asyrýda. Bulardyń basym bóligi Bolgarııa, Shveısarııa, Germanııa jáne Túrkııa elderiniń jobalary.
– Indýstrııalyq aımaqtyń atqarar qyzmeti san-salaly. Onyń mindeti qomaqty ınvestısııa quıa alatyn otandyq jáne sheteldik kásiporyndardy aımaq aýmaǵyna ornalastyrýmen shektelmeıdi. Buǵan qosa biz osy arqyly óńirdegi salyqtyq bazanyń kólemin odan ári keńeıtý sharalaryn belgilep otyrmyz. Al túpki maqsat – jańa jumys oryndaryn ashýdy odan ári jalǵastyrý bolyp qala bermek, – dedi bizge Aqtóbe oblystyq ekonomıka jáne bıýdjettik josparlaý basqarmasynyń basshysy Oljas Smaǵulov.
Sóz sońynda «Aqtóbe» ındýstrııalyq aımaǵynyń keleshegi týraly eki-úsh aýyz sóz qosqandy jón kóremiz. Bul, birinshi kezekte, ındýstrııalyq-ınnovasııalyq turǵydan damýdyń taptyrmas tetigi, taptyrmas múmkindigi. Ári ındýstrııalyq aımaq – óńir ekonomıkasynyń tamyr soǵysyn retke keltire alatyn barometr. Bul qurylym tolyq qaıtarymmen jumys istegen jaǵdaıda óńirdegi tabystar men jetistikter tizbegi de óse túspek. Sonymen birge ındýstrııalandyrý múddesin kózdeıtin qurylym álemdik ólshemder men talaptarǵa saı óndiristiń órisin ashýdyń ómirsheń tásili. Bıyl «Aqtóbe» ındýstrııalyq aımaǵynyń ıgerilý kórsetkishi 50 paıyzdyq mólsherdi qurady. Onyń qurylǵan eki jyldyq merzimine shaqqanda munyń ózi qanaǵat tutýǵa turatyndaı kórsetkish.
Ekinshi bir qyrynan qarastyrǵanda, aımaqtyń aıtarlyqtaı mol áleýeti qazirgi kúni tolyq paıdalanylmaı turǵany da aıqyn kórinedi. Alaıda aldaǵy jyly osy olqylyqtyń orny tolyǵatyn túri bar. Osy kezde munda taǵy da on kásiporyn óz jumysyn bastaıdy dep kútilýde. Sol ýaqytta «Aqtóbe» ındýstrııalyq aımaǵynyń ıgerilý kórsetkishin shamamen 75-80 paıyzǵa deıin kóterýge múmkindikter týady.
Temir QUSAIYN,
«Egemen Qazaqstan»
AQTО́BE
