AES kompanııalar tobynyń qazaqstandyq bólimshesi osymen oblysqa ekinshi balabaqshanyń kiltin tabystap otyr. Atalmysh kásiporyn 2012 jyly Semeı qalasynda 160 oryndyq balabaqsha salyp bergen bolatyn. Tárbıe oshaǵynyń ashylýyna qatysqan aımaq basshysy Danıal Ahmetov Shyǵys Qazaqstan balǵyndardy mektepke deıingi tárbıemen 100 paıyz qamtyǵan oblystyń biri ekendigin, balabaqshalar qurylysyn bıýdjetten tys kózderden qarjylandyrý óńirde dástúrge aınalǵanyn atap ótip, shaǵyn aýdan turǵyndaryn qýanyshty sátterimen quttyqtady.
500 úıge jaryq berildi
Bul kúni О́skemendegi №20 shaǵyn aýdannyń turǵyndary kópten kútken elektr qýatyna qol jetkizip, máre-sáre boldy. Bıyl jazda atalǵan shaǵyn aýdan turǵyndary oblys ákimimen kezdeskende 500-den astam jer úıdiń jaryqty generator arqyly alyp otyrǵanyn aıtyp, muń-muqtajdaryn jetkizgen-di. Sol kezdesýde óńir basshysy bul máseleni jyl sońyna deıin sheship berýge ýáde bergen bolatyn. Nátıjesinde, elektr jelisin tartý úshin bıýdjetten 120 mln teńge bólingen. Jaryq kelip, kózderi ashylǵan aýdan turǵyndarymen tildesken D.Ahmetov káriz júıesiniń qurylysy kelesi jyly aıaqtalatynyn, jol máselesi de sheshimin tabatynyn, sý qubyryn tartý úshin 2018 jyly 980 mln teńge bólinetinin jetkizip, bir qýantyp tastady.
О́skemendegi A.Pýshkın atyndaǵy oblystyq kitaphanada fılologııa ǵylymdarynyń kandıdaty, Sársen Amanjolov atyndaǵy ShQMÝ-diń dosenti Lıýsııa Abdýllınanyń orys tilinde jaryq kórgen «Nazarbaevsha sóıleý» atty kitabynyń tusaýkeser rásimi ótti. «Qazirgi kúni sheshendik sheberlik kásibı qyzmettiń barlyq salasyna qajet. Kópshilik aldynda sheber sóıleýdiń joǵary deńgeıi – karerlik ósý satysynyń kepili. Bul rette bizdiń Prezıdentimizdiń sóz sóıleý máneri, sheshendigi kópshilikke úlgi», deıdi kitap avtory.
Semeıde 1200 oryndyq mektep salyndy
Tuńǵysh Prezıdent kúni Semeı shaharynda da este qalarlyq taǵylymdy sharalarmen atap ótildi. Bul kúni «Ushaqtar» kenti shaǵyn aýdanynda jańa úlgidegi 1200 oryndyq mektep saltanatty túrde ashyldy. Jaratylystaný-matematıka baǵytyndaǵy bilim ordasy jańa modıfıkasııa synyptarymen jabdyqtalǵan. Mektepte bilim alyp qana qoımaı, balalardyń jan-jaqty damýy úshin barlyq jaǵdaı jasalǵan. Sporttyq jáne gımnastıkalyq qurylǵylary bar eki sport zaly jumys isteıdi.
Mata, aǵash jáne metall óńdeýge arnalǵan sońǵy tehnologııadaǵy quraldarmen jabdyqtalǵan sheberhanalar oqýshylardyń qolónermen shuǵyldanýyna múmkindik beredi. Keń saraıdaı jarqyraǵan tárbıe oshaǵynyń ashylýyna О́skemennen arnaıy kelgen oblys ákimi bıyldyń ózinde Semeıde eki birdeı bilim shańyraǵy boı kótergenine, memlekettiń bilim salasyna aıryqsha kóńil bólip jatqanyna toqtalyp, mektep ujymy men oqýshylardy merekemen quttyqtady.
Sonymen qatar aımaq basshysy mereke kúni Shákárim atyndaǵy memlekettik ýnıversıtettiń stýdentteri men magıstrantaryna táýelsizdiktiń alǵashqy jyldaryndaǵy elimizdiń saıası, áleýmettik jaǵdaıy, sol kezdegi qıyndyqtar, egemendiktiń eleń-alań shaǵyndaǵy Elbasynyń eńbegi, qabyldaǵan sheshimderi jaıynda dáris oqydy. «Sol kezderi shynyn aıtqanda naryqtyq ekonomıkanyń ne ekenin bilmedik. Qazirgideı qalaǵan ýaqytyńda qarap, bilimińdi tolyqtyratyn ınternet degen dúnıe bolǵan joq. Sol úshin de Astanaǵa ár sársenbi saıyn ushyp keletinbiz, Prezıdent bizge eldi qıyn ekonomıkalyq daǵdarystan shyǵarýdyń joldaryn, qandaı qadamdar jasaý qajettigin aıtyp, túsindiretin», dedi D.Ahmetov.
Aıtýly mereke óńirdiń aýdandarynda da keńinen atap ótilip, birqatar mańyzdy áleýmettik nysandar el ıgiligine berildi. Glýbokoe aýdanynyń Altaı aýylynda memleket-jekemenshik seriktestigi aıasynda 100 oryndyq «Sáýletaı» atty balabaqsha esigin aıqara ashsa, Zyrıan aýdanynyń Serebrıanka qalasynda 120 oryndyq «Berik» atty jekemenshik balabaqsha iske qosyldy. Jarma aýdanynyń Qalbataý aýylynda aýmaqtyq áleýmettik qyzmet kórsetý ortalyǵy jańa ǵımaratqa kóshirilip, Sýyqbulaq kentine «Nurly jol» baǵdarlamasy sheńberinde sý qubyry tartyldy. Tarbaǵataı aýdanynyń Tana myrza jáne Sulýtal aýyldaryna taza aýyz sý berilip, memleket-jekemenshik áriptestik aıasynda jóndelgen 19 shaqyrym jol paıdalanýǵa berildi.
Azamat QASYM,
«Egemen Qazaqstan»
Shyǵys Qazaqstan oblysy
