Sýret: Footboom.kz
Eýropa Lıgasy toptyq kezeńiniń sheshýi raýndynda elordalyq klýb syrt alańda Chehııanyń «Slavııa» klýbyn 1:0 esebimen jeńip tuńǵysh ret týrnırdiń 1/16 fınalyna shyqty. Oıynnyń 38 mınýtynda Marın Anıchıch gol soǵyp, «Astanany» alǵa shyǵardy. Qýanyshymyzǵa oraı, bul – oıyndaǵy jalǵyz gol edi. Alań ıeleri úlken kúshpen shabýyldasa da, «Astana» qaqpasynyń kiltin taba almady. Osylaısha, "Astana" 10 upaımen "A" tobynda Vılıarrealdan keıingi ekinshi oryndy ıelendi.
Osyǵan deıin eshqandaı qazaqstandyq klýb toptyq kezeńnen óte almaǵan. «Astananyń» bul jeńisi osy sebepti Qazaqstan fýtbolynyń tarıhynda altyn árippen jazylady.
1/16 fınaldaǵy óz qarsylasyn "Astana" 11 jeltoqsan kúni biletin bolady. Jerebe Nıýonda Astana ýaqytymen 18:00 ótedi. 1/16 fınal oıyndarynyń kópshiligi 15 jáne 22 aqpan kúnderi ótpek, alaıda naqty kúntizbeni ÝEFA jaqyn arada bekitpek.
