Kezdesýde memlekettik organdar startaptarǵa qandaı naqty qoldaý kórsetiletinin túsindirdi. Ásirese sapaly derekterge qoljetimdilikti keńeıtý máselesine basymdyq berilip otyr.
Jasandy ıntellekt jáne sıfrlyq damý vıse-mınıstri Dmıtrıı Mýnnyń aıtýynsha, bul bastamanyń basty maqsaty – memlekettik derekterge qoljetimdilikti barynsha jeńildetý. Endi ázirleýshiler daıyn málimettermen shektelmeı, óz jobasyna qajet naqty derekterdi de surata alady. Eger jasandy ıntellekt modelin oqytýǵa belgili bir aqparat jetispese, tıisti ótinim berip, qajetti derekterdi alýǵa múmkindik bar. Osylaısha, bul múmkindik jańa tehnologııalyq sheshimderdiń paıda bolýyna jáne startaptardyń jumysyn jedeldetýge jol ashady.
Bul baǵyttaǵy negizgi alańnyń biri – «Ashyq Data» portaly. Mınıstrlik pen «Ulttyq aqparattyq tehnologııalar» AQ birlesip iske qosqan platformada túrli salany qamtıtyn eki júzge jýyq derek jıyntyǵy bar. Onyń ishinde buryn jarııalanbaǵan biregeı málimet te jınaqtalǵan. Derekter apta saıyn jańartylyp, paıdalanýshylarǵa tegin usynylady. Portal 120-dan astam memlekettik aqparattyq júıeni biriktirip, ázirleýshilerge qajetti aqparatty bir jerden alýǵa múmkindik beredi.
Alaıda jasandy ıntellekt júıesin jasaý tek derektermen shektelmeıdi. Ony óńdep, taldaıtyn esepteý qýaty da qajet. Osy baǵytta ázirleýshilerge arnalǵan «AlemLLM» platformasy tanystyryldy. Bul qyzmet arqyly kompanııalar neırojelilerdi oqytýǵa qajetti resýrstarǵa arnaıy ótinim berý arqyly qol jetkize alady. Iаǵnı startaptar kúrdeli ınfraqurylym izdep áýre bolmaı, óz jobasyn tezirek iske qosa alady.
Sıfrlyq úkimetti qoldaý ortalyǵynyń bas dırektory Álııa Ospanovanyń aıtýynsha, arnaıy arhıtektýralyq portal arqyly memlekettik organdardyń IT-josparlary ashyq jarııalanǵan. Endi kompanııalar qaı salada qandaı derekter baryn, qaı baǵytta sıfrlandyrý qajet ekenin kóre alady. Bul bızneske naqty suranysty túsinip, soǵan saı tehnologııalyq sheshimder usynýǵa múmkindik beredi.
Mundaı ashyqtyq IT-naryqqa da tıimdi. О́ıtkeni ázirleýshiler endi memleketke ne qajet ekenin syrttaı boljaýmen shektelmeıdi. Kerisinshe, naqty suranysqa saı ónim ázirleýge beıimdeledi. Bul bir jaǵynan memlekettik organdar men tehnologııalyq orta arasyndaǵy baılanysty kúsheıtse, ekinshi jaǵynan jańa sıfrlyq sheshimderdiń tezirek paıda bolýyna jol ashady.
Jıyn sońynda IT-bıznes ókilderi derekterdi alý joldary, tehnıkalyq tetikter jáne birlesken qanatqaqty jobalardy iske qosý máseleleri jóninde saýaldaryn qoıdy. Spıkerler mundaı ashyq dıalog aldaǵy ýaqytta da jalǵasatynyn aıtty. Bul bastama memleket pen tehnologııalyq naryq arasyndaǵy baılanysty nyǵaıtyp, ıdeıadan daıyn jasandy ıntellekt ónimine deıingi joldy qysqartýǵa yqpal etpek.
