Oıyn bastalmas buryn «Slavııanyń» quramyna qarap uzaq otyrdym. Bylaı qarasańyz fýtbolshylarynyń quramy kádimgideı tisqaqqandardan quralǵan. Iаn Lashtývka «Shahter» Donesk komandasynyń negizgi qaqpashysy bolǵan. Mıgel Dannı týraly da kóptegen estelikter bar. «Zenıt» sapynda jarqyldap, Sýperkýboktyń fınalynda «Manchester Iýnaıted» qaqpasyna gol soqqan portýgalııalyqty tanystyryp jatýdyń ózi beker. Qazaqstandyq fýtbol jankúıerleri tegis tanıdy. 2012 jyly «eń ádemi goldy» kim jeńgenin biletin shyǵarsyzdar? Sol shaqta «Fenerbahcheniń» oıynshysy bolǵan Mıroslav Stoh qazir «Slavııanyń» sapynda. Osydan 2 jyl buryn Qazaqstan ulttyq quramasymen birge Plzendegi Chehııa – Qazaqstan oıynyna barǵan edim. Ol match ta qazir kóz aldymda sulbalanyp tur. 75-mınýtqa deıin jeńip turdyq. Alańǵa almasyp kirip, 2 gol salyp, salymyzdy sýǵa jibergen Mılan Shkoda «Slavııanyń» bir atary. 2004 jyly Qazaqstan quramasy ÝEFA jalaýynyń astynda alǵashqy oıynyn Ýkraınaǵa qarsy ótkizdi emes pe? Iá, dál sol tarıhı matchta biz sońǵy sekýndta gol jiberip, teń nátıjeden aıyrylyp qaldyq. Goldy Rýslan Rotan soqty. Ol «Slavııada» 29 nómermen óner kórsetedi. Tomash Nesıdti qoıyńyzshy, «SSKA» sapynda surmergen bolsa, kezinde bolǵan shyǵar. Bizdiń qazaq fýtbolyna qarsy eshteńe istemedi. Al myna Halıl Altyntop álgi 2010 jyly Sıdelnıkovtyń qaqpasyna ǵalamat gol soqqan Hamıt Altyntoptyń syńary ǵoı. Jalpy, qarap otyrsaq, estelikter sondaı bir jyly deı almaısyz. Barlyǵy qazaqstan fýtbolyna kesirin tıgizip ketken. Tájirıbıeli, ózderiniń sporttyq ǵumyrlarynda joǵarǵy nátıjelerdi tirkegen aıaqdopshylar.
1-taım
Kezdesý bastalysymen qos komanda birden shabýyl jasaýǵa asyqpady. Ekeýi de emen-jarqyn pas almasyp, ózderiniń kishigirim daıyndaǵan qıturqy kombınasııalaryn iske asyryp kórgisi keldi. Alaıda, sondaı bir ǵalamat shabýyldardykóre almadyq. Al oıynnyń 25-mınýtyna qaraı bizdiń qaqpamyzdyń aldynda buryshtamalar kóbeıip, qaýipti sátter paıda bola bastady. «Slavııa» qaqpashysy Iаn Lashtývka jaýraǵannan dene qyzdyryp, arly-berli júgirip júrdi. Al 38-mınýttan bastap shabýylǵa shyǵa bastaǵan elordalyqtar standartty jaǵdaı oryndaýǵa múmkindik aldy. Aıyp alańyna kóterilgen pas baıqaýsyzda Marın Anıchıchtiń aldyna kele qady. Qorǵaýshymyz bos qaqpaǵa gol soqty. Alaıda, qaptaldaǵy tóreshi ofssaıd jaǵdaıy bolǵandyǵyn kórsetti. Degenmen, bas tóreshi Anıchıchke doptyń Tomash Nesıdke tıip kelgenin anyq kóripti. Aqyldasa kele salynǵan goldyń ádil bolǵanyn bildirtti. Tablodaǵy kórsetkish 0:1.
2-taım
Ekinshi taım bastalysymen «Slavııa» shabýylǵa shyqty. Al qazaqstandyqtar qorǵanysqa saq bolyp, arakidik qarymta shabýyldarǵa ıek artyp júrdi. 78-mınýtqa deıin qaqpashymyz Nenad Erıch ýaqyt sozýmen aınalysyp júrgen jerinen sary qaǵaz aldy. Odan ári qaptaǵan buryshtamalar degbirimizdi qashyrdy. Qorǵaýshylarymyz shabýyldardy biriniń artynan birin qaıtaryp jatty. Ortada júrgen Serikjan Mujyqovtyń ornyna Stanımır Stoılov qorǵaýshy Sergeı Malyıdy shyǵardy. Boıy uzyn ortalyq qorǵaýshy komandaǵa aýadaı qajet bolyp turdy. Alań jıeginde Stoılovtyń kómekshisi Grıgorıı Babaıan 80-mınýttan bastap baıyz taýyp otyra almady. Aıaqtan tik turyp, shákirtterine aqyl aıtýmen boldy. Júıkeni tozdyryp ketken sońǵy 10 mınýt ǵasyrdan uzaqqa sozyldy. Tóreshiniń sońǵy ysqyryǵy qazaqstandyq klýbty pleı-off satysyna alyp shyqty. Qazaqstan fýtbolynyń altyn tarıhyna enetin bul oıyndy trıbýnada tolqyp otyryp kórgen mende de arman joq, qazaq fýtbolynyń jankúıerlerinde de arman joq. Alǵa, «Astana, alǵa Qazaqstan!
Ermuhamed Máýen,
«Egemen Qazaqstan», Praga, Chehııa.
