«Keshegi Atatúrik, Babyr, odan ary Bilge qaǵan túgel túrkiniń túpki tarıhyn tasqa qashap jazǵan. Beride úzilip qalǵan osy ulaǵatty dástúrdi Elbasymyz qaıta jańǵyrtyp otyr. Búgin bizdiń qolymyzǵa Elbasynyń «Táýelsizdik dáýiri» atty jańa kitaby tıdi. Bul kitap azattyqtyń aq tańyndaǵy jas memlekettiń alǵashqy demin, árbir qadamyn, eńsesin tiktep, qulashyn qalaı jazǵanyn naqty dáıektermen jınaqtaǵandyqtan, ony táýelsizdik tarıhynyń atlasy, jańa shejiremizdiń boıaý-bolmysy túgel qamtylǵan tutas kartınasy deýge bolady», dedi Darhan Qydyráli.
Tarıh ýaqyttyń uzaqtyǵymen emes, mańyzdy oqıǵalarmen de ólshenetinin aıtqan gazet basshysy kitaptyń mazmunyna toqtaldy.
«Qazaqstannyń qurylýy men qalyptasýy hronologııalyq jáne júıeli túrde qamtylǵan bul irgeli eńbekte táýelsizdik jyldaryn jańǵyrýdyń úsh tolqynyna balaǵan Nursultan Ábishuly el tarıhyn kezeń-kezeńge bólip, árbir salany jeke-dara qarastyrady. Júz jylǵa bergisiz shırek ǵasyr Táýelsizdik dáýiriniń bastaýy boldy. Bul kezeń kitapta «Uly dáýir» dep atalady. Osy dáýirde jańa turpatty memlekettiń, jańa qoǵamnyń barlyq salasy óz tarıhynyń alǵashqy paraǵyn ashyp, jetistikterge toly jylnamasy jazyla bastady», dedi D.Qydyráli.
Elimizde eń kóp talqylanatyn taqyryptyń biri qazaq tili ekenin, memlekettik tildiń máselesi táýelsizdiktiń eleń-alańynan beri Elbasynyń nazarynan tys qalmaǵanyn aıtyp sózin sabaqtaǵan Darhan Qydyráli jańa kitapta da til saıasatynyń tetikteri «Qazaq tili – qazaq ultynyń mádenı tutastyǵynyń basty qaınar kózi. Ǵasyrlar boıy solaı bolǵan, bolashaqta da solaı bola beredi» dep jazylǵanyn atap ótti.
«Kitapta myńdaǵan oqıǵalar aıtylyp, kóptegen tulǵalardyń attary atalady. Bul bizge táýelsizdik dáýirinde árbir detaldiń mańyzdy ekenin bildirýmen qatar, avtordyń zamandastaryna degen qurmetin de sezdiredi. Qoǵam ómiriniń damýynda mańyzy zor buqaralyq aqparat quraldary jaıynda da kóptegen jaıttarǵa qanyǵamyz. Máselen, «2017 jyly memlekettik buqaralyq aqparat quraldary jańǵyrtyldy, jetekshi gazetter óz kelbetterin ózgertip, jańa damý jolyna tústi», dep baǵa beredi ol.
Gazet basshysy kitapta túrki ıntegrasııasyna qatysty da kóptegen máselelerdiń kóterilgenin, sonyń ishinde Túrki akademııasynyń qalaı qurylǵany jazylǵany týraly aıtty.
«Eń bastysy, avtor atap kórsetkendeı, bul kitap táýelsiz Qazaqstannyń dańqty tarıhyn bilýge jáne túsinýge, elimizdi maqtan eter jasampazdar qatarynyń kóbeıýine septesedi dep senemiz. Sondyqtan, dáıekti derektermen órilgen «Táýelsizdik dáýiri» – Qazaq Eliniń tarıhyna úńiletin zertteýshiler men ótkenimizdi zerdeleıtin árbir oqyrmannyń udaıy júginetin kitaby bolady dep oılaımyz. Sebebi bul – jasampaz jyldardyń jıyntyq jylnamasy! Bul – Máńgilik eldiń temirqazyǵyna aınalǵan tutas dáýirdiń shejiresi! Bul – Azattyq arhıtektory alǵan abyroıly asýdyń aınymas aıǵaǵy! Táýelsizdik merekesi barshaǵa qutty bolsyn!», dep aıaqtady óz sózin Darhan Qydyráli.
Maıgúl SULTAN,
«Egemen Qazaqstan»
