Astana qalasy ákiminiń tapsyrmasy boıynsha elordanyń Densaýlyq saqtaý basqarmasy «Astana – deni saý adamdardyń qalasy» atty salany damytý tujyrymdamasyn ázirleýde.
Atalmysh baǵdarlamalyq qujat elordanyń densaýlyq saqtaý júıesiniń aldaǵy besjyldyq damý baǵytyn anyqtaıtyn bolady.
«Halyqtyń densaýlyǵyn medısınalyq kómektiń sapasyn joǵarylatý men qoljetimdiligin qamtamasyz etýdiń negizinde nyǵaıtý, densaýlyq kórsetkishin josparly túrde álemniń 30 damyǵan eliniń deńgeıine jetkizý úshin medısınalyq kómek kólemi men qurylymyn aýrý-syqaý men halyq suranysyna saı keltirý tujyrymdamanyń basty maqsaty bolyp tabylady», - dedi qalalyq densaýlyq saqtaý basqarmasynyń basshysy Qamaljan Nadyrov qoǵamdyq tyńdaý barysynda.
Onyń aıtýynsha, 2022 jylǵa qaraı elordadaǵy bala týý kórsetkishin arttyrý men halyqtyń ómir súrý uzaqtyǵyn 72 jasqa deıin jetkizý baǵdarlamanyń negizgi maqsatty ındıkatorlary bolyp anyqtalǵan.
«Negizgi ındıkatorlarǵa qol jetkizý maqsatynda biz birqatar fokýs ındıkatordy anyqtadyq. Dálirek aıtqanda, bul: qanaınalym júıesi aýrýlarynan, qaterli isikterden, jaraqattar men ýlanýlardan bolatyn ólimder sanyn, sondaı-aq, ana men bala ólimderin azaaıtý ındıkatorlary», - dep atap ótti Q. Nadyrov.
Kún saıyn elordada 70 bala dúnıege kelip, 10 adam ómirden ozady, 400-den astam adam aýrýhanaǵa jatqyzylady, 1500 tarta adam jedel járdem qyzmetin shaqyrady. Kún saıyn qala emhanalarynyń kómegine 8,5 myń adam júginedi. Jergilikti hırýrgter kún saıyn 120 asa kúrdeli ota jasaıdy.
