Nursat shaǵyn aýdanynda boı kótergen kópqabatty 11 turǵyn úı «Nurly jer» turǵyn úı qurylysy baǵdarlamasynyń ekinshi baǵyty boıynsha salynǵan. Jalpy 31,5 myń sharshy metr bolatyn úılerdegi 558 baspana kilti Turǵyn úı qurylys jınaq bankiniń salymshylary men jergilikti atqarýshy organda kezekte turǵan azamattarǵa berildi.
Ákimshilik-iskerlik ortalyǵynda paıdalanýǵa berilgen 9 qabatty 48 páterli eki turǵyn úıdegi baspana kiltin Ońtústik Qazaqstan oblysynyń ákimi J.Túımebaev, oblystyq máslıhatynyń hatshysy Q.Balabıev, Shymkent qalasynyń ákimi N.Saýranbaev jáne qalalyq máslıhatynyń hatshysy N.Beknazarov arnaıy tabystap, barsha turǵyndardy jańa qonyspen quttyqtady.
«Elimizde turǵyndardy baspanamen qamtý máselesi júıeli túrde júrgizilýde. Búginde memleket qoldaýynyń nátıjesinde oblysymyzda baspanaǵa qoly jetip, qonys toıyn toılap jatqandardyń qatary az emes. Máselen. Osy jyly «Nurly jer» turǵyn úı baǵdarlamasy aıasynda Shymkent qalasynda 83 turǵyn úıdiń ıaǵnı 5052 páterdiń qurylysy bastalǵan bolatyn. Búgin merekesi qarsańynda osy turǵyn úılerdiń 11-i, ıaǵnı, 558 páter berilip otyr. Jyl sońyna deıin taǵy da arendalyq 1152 páter bolatyn 16 turǵyn úıdiń qurylysyn paıdalanýǵa tapsyrý josparlanýda. Demek, osy aıdyń ózinde qanshama otbasy qonys toıyn toılamaq. Bul egemendi elimizdiń jemisi dep bilemin», - dep aıtty aımaq basshysy.
Sondaı-aq, Janseıit Qanseıituly baspanaly bolǵan turǵyndarǵa balalarynyń atynan bir-bir aǵashtan otyrǵyzyp, sony kútip baptaýdy usyndy.
Jalpy 2017 jyly barlyq qarjylandyrý kózderi arqyly oblysta 279 turǵyn úıdiń qurylysy júrgizilýde. Ol jalpy sharshy metri 995,7 myń bolatyn 14 694 páter. Jyl sońyna deıin atalǵan úılerdiń 109-nyń ıaǵnı 5893 páterdiń qurylysyn aıaqtap, paıdalanýǵa tapsyrý josparlanyp otyr.
2017 jyldyń 11 aıynyń qorytyndysy boıynsha oblystaǵy jalpy jeke jáne kópqabatty 547,1 myń sh.m. turǵyn úı paıdalanýǵa berildi, ótken jyldyń osy merzimimen salystyrǵanda 4,1 paıyzǵa ulǵaıǵan.
