Atalǵan sharany ótkizýdegi basty maqsat – Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasy aıasynda elimizdiń keshegisi men búgingisin túgendep, bolashaqqa baǵdar jasaý. Táýelsiz Qazaqstannyń búgingi kelbetin qalyptastyrǵan qundylyqtar jáne keshegi memleket qurýdaǵy «Alash» partııasy men Alashorda úkimetiniń qadamdary aqyndar jyrlaryna ózek boldy. Ásirese Alash arystarynyń isine tarıhı baǵa berý arqyly olardyń óskeleń urpaqqa qaldyrǵan ósıetterin nasıhattaýǵa, jas urpaq boıyna patrıottyq tárbıeni sińirý jaıyna jáne de ulttyq qundylyqtar men rýhanı muralardy ashyp kórsetýge erekshe mán berildi. Bul rette aqyndar qazaq tarıhynda óshpes iz qaldyrǵan qaıratkerlerdi de jyrlaryna arqaý etti. Músháıraǵa jasy 16-dan asqan aqyndar qatysyp, ózderiniń baqtaryn synap kóristi. Eń basty shart, aqyndar óz óleńderin buryn esh jerde jarııalamaǵan bolýy tıis jáne táýelsizdikke arnalǵan bolýy shart. Al shyǵarma kólemine eshqandaı shek qoıylǵan joq. Sonymen qazylar alqasynyń sheshimimen bas júldeni Sh.Ýálıhanov atyndaǵy Kókshetaý memlekettik ýnıversıtetiniń stýdenti Kúlásh Nysanbek jeńip aldy. Birinshi oryn Kóken Shákeıuly atyndaǵy aqyndar mektebiniń shákirti Qarashash Uǵylanǵa buıyrsa, ekinshi oryndy «Býrabaı» kolledjiniń qazaq tili men ádebıeti pániniń muǵalimi Serǵazy Qaıyrboldy ıelendi. Úshinshi oryndy Kóken Shákeıuly atyndaǵy aqyndar mektebiniń shákirti Dýman Samat ıelenip, aıtýly aqyndar mektebi qatysýshylaryn taǵy bir qýantty. Qatysýshylardyń barlyǵy da baǵaly syılyqtarmen, dıplomdarmen jáne alǵys hattarmen marapattaldy.
Asqar TURAPBAIULY,
«Egemen Qazaqstan»
Aqmola oblysy
