Oblys ákiminiń baspasóz qyzmetiniń habarlaýynsha, quqyq qorǵaý qyzmetteriniń ortalyǵynyń ashylýyna Bas prokýratýra bastamashylyq tanytyp, «100 naqty qadam» Ult Josparyn oryndaý maqsatynda iske asyp otyr. Ortalyqtyń basty ereksheligi - zań qyzmetterin bir jerde shoǵyrlandyrý bolyp tabylady. Advokattar, sot oryndaýshylar, medıatorlar, Ádilet departamentiniń, Quqyqtyq statıstıka basqarmasynyń, halyqqa qyzmet kórsetý ortalyǵynyń ókilderi, probasııa qyzmetkerleri tegin kásibı zań kómegin kórsetip, konsýltasııa jasaıdy.
Aımaq basshysy kezdesýge qatysýshylardy ortalyqtyń ashylýymen quttyqtap, ortalyqtyń mańyzdylyǵyn atap ótti.
- Bul ortalyq halyq úshin óte paıdaly bolady, ákimshilik kedergilerdi joıady, memleket pen quqyq qorǵaý organdarynyń ımıdjin kóteredi. Ortalyqtyń jumysy halyqtyń kóńilinen shyǵyp, bolashaqta oblystyń eń úlken qalalary men aýdandarynda ashýdy josparlaý kerek dep oılaımyn, - dedi Danıal Ahmetov
Ashylǵan ortalyq - elektrondy kezek júıesi, kútý zaly jáne basqa qajetti ınfraqurylymmen jabdyqtalǵan. Múmkindigi shekteýli azamattar da nazardan tys qalmaǵan. Bul jerde pandýstar, taktıldi kórsetkish, jazbalar, múgedekterge kómek kórsete alatyn mamandardy shaqyrý úshin arnaıy tetikter ornatylǵan. Sonymen qatar, kez kelgen azamat quzyretti organǵa, onyń ishinde ortalyq deńgeıdegi organdarǵa beıneótinish bere alady. Ortalyq qala prokýratýrasynyń ǵımaratynda ornalasqan.
Azamat QASYM,
«Egemen Qazaqstan»
О́SKEMEN
